٣٦٥٠: جعفر بن محمد نے اپنے والد سے انھوں نے جابر بن عبداللہ (رض) سے طویل حدیث میں بیان کیا کہ جناب علی (رض) جناب رسول اللہ (صلی اللہ علیہ وآلہ وسلم) کے لیے یمن سے ہدی کے جانور لائے ان کی تعداد ایک سو اونٹ تھی پس جناب رسول اللہ (صلی اللہ علیہ وآلہ وسلم) نے تریسٹھ اونٹ اپنے دست اقدس سے نحر فرمائے اور علی (رض) نے سینتیس ذبح کئے آپ (صلی اللہ علیہ وآلہ وسلم) نے ان کو اپنی ہدی میں شریک فرمایا پھر ان میں سے ہر ایک اونٹ سے ایک ایک ٹکڑا لیا اور اس کو ایک ہنڈیا میں ڈال کر پکایا گیا۔ پس جناب رسول اللہ (صلی اللہ علیہ وآلہ وسلم) اور علی (رض) نے اس گوشت میں سے کچھ گوشت کھایا اور اس کا شوربہ پیا۔ جب ہماری سابقہ گفتگو سے آپ کا قارن ہونا ثابت ہوگیا اور آپ پر یہ ھدی اسی بناء پر تھی ۔ پھر آپ نے اپنے مذکورہ ہدایاذبح کیے اور ہراونٹ کے گوشت سے تھوڑا تھوڑا گوشت تناول فرمایا ۔ تو اس سے ثابت ہوا کہ تمتع و قران کی ہدی کا گوشت کھانا جائز ہے۔ پس جب یہ ہدی ان قربانیوں میں سے تھی جن کا گوشت کھایا جاتا ہے تو ہم نے نقصان کی بناء پر لازم ہونے والی قربانیوں پر غور کیا کہ ان کا حکم اس طرح ہے یا اس سے مختلف تو ہم نے یہ بات پائی کہ ناخن تر شوانے ‘ بال کاٹنے اور جماع کی وجہ سے واجب شدہ قربانی اور ہر وہ قربانی جو کسی عمل کے ترک پر لازم ہوئی ہو اس میں سے کھانا جائز نہیں۔ جب قربانی کسی گناہ کے ارتکاب یا کسی باعث لازم ہو تو سے کھانا جائز نہیں۔ اور تمتع وقران کی قربانی سے کھایا جاسکتا ہے۔ تو اس سے ثابت ہوگیا کہ یہ قربانیاں گناہ یا ترک عمل کے علاوہ اور کسی وجہ سے لازم ہوتی ہیں۔ پس یہ ان لوگوں کے خلاف پختہ دلیل ہے۔ جو حج وعمرہ کے قران و تمتع کو مکروہ جانتے ہیں۔ اب اس کے بعد تمتع و قران کو جائز قرار دینے والوں کے مابین اختلاف ہے۔ بعض علماء نے قران کو تمتع پر اور دوسروں نے تمتع کو قران پر فضیلت دی ہے۔ ہم نے اس سلسلہ میں غور کر کے دیکھا کہ قران کی صورت میں حج کا احرام جلد باندھا جاتا ہے اور تمتع کی صورت میں اس احرام میں تاخیر ہوتی ہے۔ وہ حج جس کا احرام جلد باندھا جائے وہ افضل اور زیادہ کامل ہے اور حضرت عملی (رض) سے اللہ تعالیٰ کے ارشاد واتمع الحج والعمرۃ للہ۔۔۔ کے متعلق اس طرح تفسیر وارد ہے کہ اس کا اتمام یہ ہے کہ اپنے گھر سے احرام باندھ لے۔
تخریج : ابو داؤد فی المناسک باب ٥٦‘ ابن ماجہ فی المناسک باب ٨٤‘ دارمی فی المناسک باب ٣٤۔
نوٹ : جب پہلے آپ کے حج سے متعلق ثابت ہوچکا کہ وہ قران تھا اور یہ ہدایا دم قران تھا جناب رسول اللہ (صلی اللہ علیہ وآلہ وسلم) نے ہر اونٹ سے گوشت لے کر استعمال فرمایا۔ تو اس سے ہدی تمتع اور قران کے گوشت کو کھانے کی اباحیت ثابت ہوئی جب یہ ان ہدایا میں سے ہوا کہ جن کا گوشت کھایا جاتا ہے۔ تو اب دم جبر پر غور کیا کہ ان کو کھانا درست ہے یا نہیں چنانچہ ناخن اتارنے ‘ بال مونڈنے ‘ جماع کرنے ‘ حج کی کسی ضروری چیز کو چھوڑ دینے پر جتنے دم دیئے جاتے ہیں ان کا کھانا درست نہیں۔ اور دم تمتع و قران کو کھانا جائز ہے۔ تو اس سے یہ بات پایہ ثبوت کو پہنچ گئی کہ دونوں دم جبر نہیں ہیں بلکہ دم شکر ہیں اس سے ان لوگوں کی بات نادرست ثابت ہوئی جو قران و تمتع کو جائز قرار نہیں دیتے۔
قران و تمتع میں افضلیت کا فیصلہ نظری دلیل سے :
تمتع و قران میں افضل کون ہے روایات سے ہم ثبوت دے چکے اب دلیل سے جب ہم دیکھتے ہیں کہ قران میں حج کا احرام جلد باندھا جاتا ہے جبکہ تمتع میں آٹھویں کو باندھا جاتا ہے تو وہ حج جس میں احرام جلد باندھا جائے وہ اس حج سے افضل ہے جس میں احرام تاخیر سے باندھا جائے علی (رض) کا قول اس آیت کی تفسیر ” واتموا الحج والعمرۃ اللہ “ (البقرہ۔ ١٩٦) میں وارد ہے کہ اتمام سے مراد یہ ہے کہ ان کا احرام اپنے گھر سے ہی باندھ لے۔