٣٧٧٨: ابو قزعہ سے روایت ہے کہ عبدالملک بن مروان بیت اللہ کا طواف کررہا تھا اس نے کہا ابن زبیر کو اللہ تعالیٰ ہلاک کرے کہ وہ امّ المؤمنین (رض) کے متعلق جھوٹ بولتا تھا کہ میں نے امّ المؤمنین سے سنا ہے کہ جناب رسول اللہ (صلی اللہ علیہ وآلہ وسلم) نے فرمایا۔ اے عائشہ (رض) اگر تمہاری قوم کفر کے قریب زمانہ والی نہ ہوتی تو میں بیت اللہ کو توڑتا اور اس میں حطیم کو داخل کردیتا۔ حارث بن عبدالرحمن بن ربیعہ نے کہا اے امیرالمؤمنین آپ اس طرح نہ کہیں یہ بات تو میں نے خود امّ المؤمنین سے سنی ہے۔ اس پر عبدالملک کہنے لگا۔ کاش یہ بات میں تم سے اس سے پہلے سن لیتا تو میں اسے نہ گراتا۔ جب یہ بات ثابت شدہ حقیقت بن گئی کہ مقام حجر یہ بیت اللہ شریف کا حصہ ہے اس سے متصل دونوں ارکان بیت اللہ کے اصل ارکان نہیں تو یہ خود ثابت ہوگیا کہ وہ دونوں ارکان یمانی ارکان کے مابین دیوار کی طرح ہیں جیسا کہ اس کا استلام نہیں اسی طرح اس کا بھی استلا م نہیں نظر وفکر اسی کے متقاضی ہیں کہ ان کا استلام نہ کیا جائے۔ ان دو ارکان کے متعلق جناب رسول اللہ (صلی اللہ علیہ وآلہ وسلم) کے استلام نہ کرنے سلسلہ میں حضرت ابن عمر (رض) نے اسی طرح سے ہمارے والا استدلال کیا۔
تخریج : بخاری فی العلم باب ٤٨‘ الحج باب ٤٢‘ مسلم فی الحج ٤٠٤‘ نسائی فی المناسک باب ١٢٥‘ دارمی فی المناسک باب ٤٤‘ مسند احمد ٦‘ ٥٧؍١٠٢‘ ٢٥٣؍٢٦٢۔
حاصل روایت : جب یہ بات ثابت ہوچکی کہ حطیم بیت اللہ کا حصہ ہے اور رکن شامی و عراقی یہ حقیقی رکن نہیں ہیں۔ تو اس سے یہ ثابت ہوا کہ یہ اسی طرح ہیں جیسا کہ ارکان یمانیہ کے درمیان کا حصہ ہے جس طرح وہ حصہ کسی کے نزدیک قابل استلام نہیں اسی طرح یہ بھی قابل استلام نہیں۔ نظر کا تقاضا یہ ہے کہ ان کا استلام نہ کیا جائے۔ ان دونوں ارکان کا استلام چھوڑنے پر حضرت عبداللہ بن عمر (رض) نے اسی طرح استدلال کیا ہے۔