٤٠٧١: مجاہد نے ابن عباس (رض) سے نقل کیا ہے کہ جناب رسول اللہ (صلی اللہ علیہ وآلہ وسلم) نے فرمایا اللہ تعالیٰ نے مکہ کو اس دن سے حرمت والا بنایا جس دن آسمان و زمین ‘ سورج و چاند کو بنایا اور کعبہ اللہ کو ان دو پہاڑوں اخشبین یعنی جبل ابو قیس اور جبل قیقعان کے درمیان رکھا۔ یہ مجھ سے قبل کسی کے لیے حلال نہیں ہوا اور میرے لیے بھی دن کی ایک گھڑی کے لیے حلال ہوا۔ اس کے گھاس کو نہ کاٹا جائے گا اور نہ اس کے درخت کاٹے جائیں گے اس کی گری پڑی چیز کو نہ اٹھائے ہاں وہ آدمی اٹھاسکتا ہے جو اعلان کرنے والا ہو۔ عباس (رض) کہنے لگے مگر اذخر اس لیے کہ اہل مکہ کو اپنے گھروں اور قبور کے لیے اس کی اشد ضرورت ہے اس پر آپ نے فرمایا مگر اذخر کو کاٹنے کی اجازت ہے۔
تخریج : بخاری فی الجنائز باب ٧٦‘ والعلم باب ٣٩‘ والصید باب ٩؍١٠‘ واللقطہ باب ٧‘ والمغازی باب ٥٣‘ مسلم فی الحج ٤٤٥؍٤٤٧‘ ابو داؤد فی المناسک باب ٨٩‘ نسائی فی الحج باب ١١٠‘ ١٢٠‘ ابن ماجہ فی المناسک باب ١٠٣‘ مسند احمد ١‘ ٢٥٣؍٢٥٩‘ ٣؍١٩٩۔
لغات : : اخشبان۔ یہ دو پہاڑوں کو کہتے ہیں۔ ابو قبیس ‘ قیقعان۔ الاختلاء۔ کاٹنا۔ خلا۔ ترگھاس۔ لایعضد۔ نہ کاٹنا۔ لقطہ۔ گری پڑی چیز منشد۔ گمشدہ کا اعلان کرنے والا۔ الاذخر۔ عمدہ خوشبو والی نبات ہے۔