٤٤٤٥: عکرمہ نے ابن عباس (رض) سے نقل کیا کہ ان سے اللہ تعالیٰ کے اس ارشاد کے متعلق دریافت کیا گیا : { وَلَا یَخْرُجْنَ اِلَّا أَنْ یَأْتِیْنَ بِفَاحِشَۃٍ مُبَیِّنَۃٍ } تو انھوں نے فرمایا فاحشہ مبینہ یہ ہے کہ مرد کے عزیزواقارب کو فحش گوئی کرے اور ان کو ایذاء پہنچائے تو فرمانے لگے فاطمہ کو سکنیٰ سے محروم اسی لیے کیا گیا تھا کیونکہ وہ بدکلام تھیں اور نفقہ سے محرومی کی وجہ ان کا حاملہ نہ ہونا تھا۔ معترض نے کہا کہ اس روایت سے ثابت ہوا کہ مبتوتہ کا نفقہ صرف حامل ہونے کی صورت میں ہے۔ ورنہ نہیں۔ تو اس کے جواب میں کہا جائے گا ۔ اگر روایت فاطمہ (رض) کا مفہوم وہی لیا جائے جو آپ نے نکالا ہے تو اس سے حضرت عمر ‘ عائشہ ‘ اسامہ (رض) اور دیگر صحابہ کرام جنہوں نے روایت فاطمہ (رض) سے انکار کیا ہے ان کے متعلق وہم پیدا ہوجائے گا بہتر تو یہی تھا کہ ان کی بات کو درست مان لیا جاتا تاکہ اس کے علاوہ بات یقین سے معلوم ہوجائے اور وہ کیوں کر درست نہ ہوگا اگر بالفرض روایت فاطمہ (رض) کو درست قرار دیا جائے تو یہ بھی درست ماننا ہوگا کہ اس روایت کا معنی اس کے علاوہ ہو جو آپ نے بیان کیا ہے۔ وہ یہ ہے کہ عین ممکن ہے کہ جناب رسول اللہ (صلی اللہ علیہ وآلہ وسلم) نے اس کی بدکلامی سے اسے رہائش سے محروم فرمایا جیسا کہ تم نے ذکر کیا اور آپ نے یہ خیال فرمایا ہو کہ یہ وہی فاحشہ ہے جس کا تذکرہ اللہ تعالیٰ نے فرمایا ہے اور نفقہ سے محروم اس لیے کیا کہ وہ بدکلامی کی وجہ سے نافرمان قرار پائی۔ کہ وہ اسی بدکلامی کی وجہ سے خاوند کے گھر سے نکالی گئی کیونکہ جب مطلقہ عدت کے دوران خاوند کے گھر سے چلی جائے تو اس کے خاوند پر نفقہ لازم نہیں ہوتا یہاں تک کہ وہ گھر واپس لوٹ آئے اسی طرح حضرت فاطمہ (رض) کو نافرمانی کی وجہ سے نفقہ نہ دیا گیا جس کی بناء پر وہ خاوند کے گھر سے چلی گئیں اور ممکن ہے کہ جناب رسول اللہ (صلی اللہ علیہ وآلہ وسلم) نے یہی معنی مراد لیا ہو اگر حدیث فاطمہ (رض) درست ہو اور ہوسکتا ہے کہ وہ مفہوم مراد لیا ہو جو تم نے بیان کیا ہو اور یہ بھی ممکن ہے کہ آپ کی مراد ان دونوں کے علاوہ کوئی اور معنی ہو اور ہمیں وہ معلوم نہ ہوا ہو کیونکہ جناب رسول اللہ (صلی اللہ علیہ وآلہ وسلم) کے متعلق یہ فیصلہ نہیں کیا جاسکتا کہ آپ نے فلاں معنی ہی مراد لیا ہو کوئی دوسرا معنی مراد نہیں لیا جیسا کہ تم نے جناب نبی اکرم (صلی اللہ علیہ وآلہ وسلم) کے بارے میں یہ فیصلہ کیا کیونکہ محض گمان سے آپ کے بارے میں کوئی بات کہنا حرام ہے جیسا کہ اللہ تعالیٰ کے بارے میں محض گمان سے بات کہنا حرام ہے۔ لیجئے ! ابن عمر (رض) سے فاحشہ مبینہ کے متعلق ابن عباس (رض) کے معنی کے خلافِ معنی مروی ہے۔