٥٠٩٥: یزید بن ہرمز نے بیان کیا کہ نجدہ بن عامر نے ابن عباس (رض) کی طرف لکھا کہ ذوی القربیٰ کے حصہ کا کیا حکم ہے جس کا اللہ تعالیٰ نے قرآن مجید میں ذکر کیا اور اس کو ان کے لیے مقرر کیا۔ تو انھوں نے لکھا اور میں اس موقعہ پر موجود تھا۔ کہ ہمارا خیال یہی تھا کہ اس سے جناب رسول اللہ (صلی اللہ علیہ وآلہ وسلم) کی قرابت مراد ہے۔ مگر ہماری قوم نے ہمیں دینے سے انکار کردیا۔ یہ ابن عباس (رض) ہیں جو یہ بتلا رہے ہیں کہ ہماری قوم نے یہ حصہ ہمیں دینے سے انکار کردیا مگر جنہوں نے انکار کیا انھوں نے انکار کیے جانے والوں پر کوئی زیادتی نہیں کی۔ تو کیا یہ اس بات کا ثبوت نہیں کہ جناب رسول اللہ (صلی اللہ علیہ وآلہ وسلم) کی قرابت سے یہاں وہی مراد ہے جس کا ہم نے تذکرہ کیا یعنی فقرومحتاجی کی صورت میں ان کو دیا جائے گا۔ یہ فریق اوّل کے دلائل کا تذکرہ ہے۔ جو یہ کہتے ہیں کہ جناب نبی اکرم (صلی اللہ علیہ وآلہ وسلم) کے قرابت داروں کے لیے خمس میں سے کوئی حصہ مقرر نہیں نہ تو آپ کے زمانہ میں تھا اور نہ بعد میں ہے سوائے اس سبب کے جس کا تذکرہ ہوا۔ جناب رسول اللہ (صلی اللہ علیہ وآلہ وسلم) کے زمانہ میں ذوی القربیٰ کا حصہ مقرر تھا اور وہ خمس الخمس یعنی خمس کا پانچواں حصہ ہوتا ہے اور جناب رسول اللہ (صلی اللہ علیہ وآلہ وسلم) کو اختیار تھا کہ جس کو چاہیں عنایت فرما دیں ان کی دلیل یہ روایت ہے۔
تخریج : مسلم فی الجہاد ١٤٠‘ دارمی فی السیر باب ٣٢‘ مسند احمد ١؍٢٤٨۔