٥١٥٩: ابو مہلب نے حضرت عمران بن حصین (رض) سے روایت کی ہے کہ قبیلہ بنو ثقیف نے دو صحابہ کرام (رض) کو قیدی بنا لیا۔ صحابہ کرام نے بنو عامر بن صعصعہ کے ایک آدمی کو گرفتار کیا جناب رسول اللہ (صلی اللہ علیہ وآلہ وسلم) وہاں سے گزرے تو وہ بندھا ہوا تھا۔ آپ اس کی طرف متوجہ ہوئے تو وہ کہنے لگا مجھے کیوں قید کیا گیا ہے آپ نے فرمایا تمہارے حلیفوں کے جرم میں۔ پھر جناب رسول اللہ (صلی اللہ علیہ وآلہ وسلم) تشریف لے گئے تو اس نے آواز دی آپ اس کی طرف متوجہ ہوئے تو قیدی کہنے لگا میں تو مسلمان ہوگیا ہوں آپ نے فرمایا اگر تو اس وقت یہ بات کہتا جب تو اپنے معاملے کا مالک تھا تو مکمل طور پر فلاح و کامیابی پا لیتا۔
پھر جناب رسول اللہ (صلی اللہ علیہ وآلہ وسلم) تشریف لے گئے تو اس نے دوبارہ آواز دی آپ کے متوجہ ہونے پر کہنے لگا میں بھوکا ہوں آپ نے فرمایا میں تمہاری حاجت کو پورا کروں گا پھر جناب رسول اللہ (صلی اللہ علیہ وآلہ وسلم) نے اسے ان دو آدمیوں کے عوض چھوڑ دیا جن کو بنو ثقیف نے گرفتار کیا تھا۔
تخریج : ابو داؤد فی الایمان باب ٢١‘ مسند احمد ٤‘ ٤٣٠؍٤٣٤۔