٥٢٨١: ایوب نے حضرت عکرمہ سے نقل کیا کہ جب جناب رسول اللہ (صلی اللہ علیہ وآلہ وسلم) نے اہل مکہ سے صلح کا معاہدہ کرلیا۔ بنو خزاعہ زمانہ جاہلیت سے آپ کے حلیف چلے آ رہے تھے۔ جبکہ بنو بکر قریش کے حلیف تھے۔ تو بنو خزاعہ جناب رسول اللہ (صلی اللہ علیہ وآلہ وسلم) کی صلح میں داخل ہوئے اور بنو بکر قریش کی صلح میں داخل ہوئے۔ اس کے بعد بنو خزاعہ اور بنو بکر کے مابین لڑائی پیش آئی۔ قریش نے ہتھیاروں اور رسد سے بنو بکر کی معاونت کی اور ان کی پشت پناہی کی بنو بکر کو بنو خزاعہ پر غلبہ ملا تو انھوں نے ان کے آدمیوں کو قتل کیا بنو خزاعہ کا وفد جناب رسول اللہ (صلی اللہ علیہ وآلہ وسلم) کی خدمت میں حاضر ہوا اور ان لوگوں نے جو کچھ کیا تھا اس کی اطلاع دی اور جناب رسول اللہ (صلی اللہ علیہ وآلہ وسلم) کو نصرت کی طرف بلایا اور یہ اشعار پڑھے جن کا ترجمہ یہ ہے۔
نمبر 1: اے اللہ ! میں حضرت محمد (صلی اللہ علیہ وآلہ وسلم) کو باپ اور دادا کے درمیان ہونے والا معاہدہ یاد دلاتا ہوں۔
نمبر 2: آپ فرزند تھے اور ہم والد تھے (عمر میں بڑے تھے) بلاشبہ قریش نے معاہدے کی خلاف ورزی کی ہے۔
نمبر 3: ان کا خیال یہ تھا کہ میں کسی کو نہ بلاؤں گا انھوں نے آپ سے کیا ہوا پختہ وعدہ توڑ دیا۔
نمبر 4: اور کداء (ایک مقام کا نام ہے جو مکہ کے بلند حصہ میں واقع ہے) میں انھوں نے میرے لیے گھات بنا رکھی تھی وہ نہایت کمزور اور قلیل تعداد میں تھے۔
نمبر 4: وہ مقام وتیر میں تہجد کے وقت آئے جبکہ ہم رکوع و سجدہ میں قرآن مجید کی تلاوت میں مصروف تھے۔
نمبر 6: اس جگہ ہم نے امن پسندی کا مظاہرہ کیا اور ہم نے ہاتھ نہیں کھینچا اے اللہ کے رسول (صلی اللہ علیہ وآلہ وسلم) ہماری نہایت مضبوط مدد فرمائیں۔
نمبر 8: آپ مدد کے لیے ایسا خدائی لشکر روانہ فرمائیں جو ایسے دستوں پر مشتمل ہوں جو سمندر کی طرح جوش سے جھاگ نکال رہے ہوں۔
نمبر 9: ان دستوں میں اللہ کا رسول (صلی اللہ علیہ وآلہ وسلم) بےنیام تلوار کے ساتھ ہوں اور لڑائی کی پوری تیاری کرنے والے ہوں۔ اگر آپ سے جھک جانے کا مطالبہ ہو آپ کا چہرہ ناراضگی سے بدل جائے۔
بقول حماد بعض اشعار تو ایوب سے اور بعض یزید بن حازم سے نقل کئے اور اکثر محمد بن اسحاق سے لیے گئے ہیں۔
مگر ابن ہشام نے ان اشعار کو زیادہ درست اور پختہ انداز سے لکھا ہے۔ ملاحظہ ہو سیرۃ ابن ہشام۔ (مترجم) ۔
لغات : ناشد۔ یاد دلانا۔ الاتلد۔ نہایت پرانا۔ ولدا۔ اس سے اشارہ کیا بنو عبد مناف اور قصی کی والدہ خزاعیہ ہے) اعتدا۔ تیار۔ المدد۔ معاونت۔ تجرد۔ تیاری کرنا۔ سیم۔ مطالبہ کرنا۔ الخسف۔ ذلت۔ تربد۔ بدلنا۔