٥٢٩٤: عبدالرحمن بن ابی لیلیٰ نے حضرت علی (رض) سے بیان کیا کہ حضرت فاطمہ (رض) جناب رسول اللہ (صلی اللہ علیہ وآلہ وسلم) کی خدمت میں حاضر ہو کر ہاتھوں میں چکی کے اثرات کی شکایت کر رہی تھیں ان کو یہ اطلاع ملی کہ جناب رسول اللہ (صلی اللہ علیہ وآلہ وسلم) کے ہاں کچھ قیدی آئے ہیں تو وہ آپ سے خادم طلب کرنے آئیں چنانچہ جناب رسول اللہ (صلی اللہ علیہ وآلہ وسلم) سے ان کی ملاقات نہ ہوسکی تو حضرت عائشہ (رض) سے ملاقات ہوئی انھوں نے ان کے سامنے بات ذکر کی پھر جب نبی اکرم (صلی اللہ علیہ وآلہ وسلم) تشریف لائے تو عائشہ (رض) نے آپ کو اس بات کی اطلاع دی حضرت علی (رض) بیان کرتے ہیں کہ جناب رسول اللہ (صلی اللہ علیہ وآلہ وسلم) اس وقت ہمارے ہاں تشریف لائے جب ہم اپنے بستروں پر جا چکے تھے۔ ہم آپ کی آمد پر اٹھنے لگے تو آپ نے فرمایا کیا میں تم دونوں کو اس سے بہتر چیز نہ بتلا دوں جو تم نے مانگی ہے ؟ ٣٤ مرتبہ اللہ اکبر ‘ ٣٣ مرتبہ سبحان اللہ ‘ ٣٣ مرتبہ الحمدللہ اس وقت پڑھ لیا کرو جبکہ بستر پر لیٹو یہ تمہارے لیے خادم سے بہتر ہے۔
تخریج : بخاری فی فضائل اصحاب النبی (صلی اللہ علیہ وآلہ وسلم) باب ٩‘ والنفقات باب ٦‘ مسلم فی الذکر ٨٠‘ ابو داؤد فی الادب باب ١٠٠‘ مسند احمد ١؍٩٦۔