Abu Dawood

جابر (رض) کہتے ہیں کہ نبی اکرم ﷺ نے : واتخذوا من مقام إبراهيم مصلى اور مقام ابراہیم کو مصلیٰ بنا لو۔۔۔ (سورۃ البقرہ : ١٢٤) (امر کے صیغہ کے ساتھ بکسر خاء) پڑھا۔ تخریج دارالدعوہ : سنن الترمذی/ الحج ٣٣ (٨٥٦) ، سنن النسائی/ الحج ١٦٣ (٢٩٦٤) ، سنن ابن ماجہ/الإقامة ٥٦ (١٠٠٨) ، انظر حدیث رقم : (١٩٠٥) ، (تحفة الأشراف : ٢٥٩٥) (صحیح )

ام المؤمنین عائشہ (رض) فرماتی ہیں کہ ایک شخص نے رات میں قیام کیا اور (نماز میں) بلند آواز سے قرآت کی، جب صبح ہوئی تو رسول اللہ ﷺ نے فرمایا : اللہ فلاں پر رحم کرے کتنی آیتیں جنہیں میں بھول چلا تھا ١ ؎ اس نے آج رات مجھے یاد دلا دیں ۔ تخریج دارالدعوہ : انظر حدیث رقم : (١٣٣١) ، (تحفة الأشراف : ١٦٨٧٧) (صحیح ) وضاحت : ١ ؎ : یعنی یہ میرے ذہن سے نکل چکی تھیں، مگر اللہ تعالیٰ کو ان آیتوں کا بالکل بھلا دینا منظور نہ تھا، اس لیے اس نے اس آدمی کو قرات کے ذریعہ مجھے پھر یاد دلا دیں۔

مقسم مولیٰ ابن عباس (رض) کا بیان ہے کہ ابن عباس (رض) نے کہا ہے کہ آیت : وما کان لنبي أن يغل نبی کو یہ زیب نہیں دیتا کہ وہ خیانت کرے۔۔۔ (سورۃ آل عمران : ١٦١) ایک سرخ چادر کے متعلق نازل ہوئی جو بدر کے دن گم ہوگئی تھی تو کچھ لوگوں نے کہا : شاید رسول اللہ ﷺ نے اسے لے لیا ہو تب اللہ تعالیٰ نے : وما کان لنبي أن يغل نازل کی۔ ابوداؤد کہتے ہیں : يغل یا کے فتحہ کے ساتھ ہے۔ تخریج دارالدعوہ : سنن الترمذی/تفسیر سورة آل عمران ١٧ (٣٠٠٩) ، (تحفة الأشراف : ٦٤٨٧) (صحیح )

انس بن مالک (رض) کہتے ہیں کہ نبی اکرم ﷺ نے فرمایا : اے اللہ ! میں تیری پناہ مانگتا ہوں بخیلی اور بڑھاپے سے ١ ؎۔ تخریج دارالدعوہ : تفرد بہ أبو داود، (تحفة الأشراف : ٨٨٨) ، وقد أخرجہ : مسند احمد (٣/١١٣، ١١٧) ، انظر حدیث رقم : (١٥٤٠) (صحیح ) وضاحت : ١ ؎ : یعنی ایسی ضعیفی سے جس میں ہوش و حواس باقی نہ رہیں نہ عبادت کی طاقت رہے۔

لقیط بن صبرہ (رض) کہتے ہیں میں بنی منتفق کی طرف سے رسول اللہ ﷺ کے پاس آیا تھا، یا بنی منتفق کے وفد میں رسول اللہ ﷺ کے پاس آیا تھا پھر انہوں نے حدیث بیان کی کہ آپ نے یعنی نبی اکرم ﷺ نے لا تحسبن (سین کے زیر کے ساتھ) پڑھا اور لا تحسبن (سین کو زبر کے ساتھ) نہیں پڑھا۔ تخریج دارالدعوہ : انظر حدیث رقم : (١٤٢) ، (تحفة الأشراف : ١١١٧٢) (صحیح )

عبداللہ بن عباس (رض) کہتے ہیں مسلمان ایک شخص سے ملے جو اپنی بکریوں کے چھوٹے سے ریوڑ میں تھا اس نے السلام علیکم کہا پھر بھی مسلمانوں نے اسے قتل کردیا اور وہ ریوڑ لے لیا تو یہ آیت کریمہ : ولا تقولوا لمن ألقى إليكم السلام لست مؤمنا تبتغون عرض الحياة الدنيا جو شخص تمہیں سلام کہے اسے یہ نہ کہو کہ تو مسلمان نہیں ہے تم لوگ دنیاوی زندگی کا ساز و سامان یعنی ان بکریوں کو چاہتے ہو (سورۃ النساء : ٩٤) نازل ہوئی۔ تخریج دارالدعوہ : صحیح البخاری/تفسیر سورة النساء ١٧ (٤٥٩١) ، صحیح مسلم/التفسیر (٣٠٢٥) ، (تحفة الأشراف : ٥٩٤٠) ، وقد أخرجہ : سنن الترمذی/تفسیر القرآن النساء ٥ (٣٠٣٠) (صحیح )

زید بن ثابت انصاری (رض) سے روایت ہے کہ نبی اکرم ﷺ لا يستوي القاعدون من المؤمنين کے بعد غير أولي الضرر پڑھتے تھے۔ اور سعید بن منصور نے اپنی روایت میں كان يقرأ نہیں کہا ہے ١ ؎۔ تخریج دارالدعوہ : تفرد بہ أبو داود، (تحفة الأشراف : ٣٧٠٩) (حسن صحیح ) وضاحت : ١ ؎ : پہلے صرف لا يستوي القاعدون من المؤمنين نازل ہوئی تھی پھر جب لوگوں کو پریشانی ہوئی تو اللہ نے غير أولي الضرر نازل فرما کر آسانی کردی۔

انس بن مالک (رض) کہتے ہیں کہ رسول اللہ ﷺ نے : والعين بالعين (رفع کے ساتھ) پڑھا ١ ؎۔ تخریج دارالدعوہ : سنن الترمذی/القراء ات ١ (٢٩٢٩) ، (تحفة الأشراف : ١٥٧٢) ، وقد أخرجہ : مسند احمد (٣/٢١٥) (ضعیف) (ابوعلی بن یزید مجہول راوی ہیں ) وضاحت : ١ ؎ : جیسا کہ کسائی کی قرات ہے اور اکثر کے نزدیک نصب کے ساتھ ہے۔

انس بن مالک (رض) کہتے ہیں کہ نبی اکرم ﷺ وکتبنا عليهم فيها أن النفس بالنفس والعين بالعين اور ہم نے یہودیوں کے ذمہ تورات میں یہ بات مقرر کردی تھی کہ جان کے بدلے جان اور آنکھ کے بدلے آنکھ ہے (سورۃ المائدہ : ٤٥) (عین کے رفع کے ساتھ) پڑھا۔ تخریج دارالدعوہ : انظر ما قبلہ، (تحفة الأشراف : ١٥٧٢) (ضعیف )

عطیہ بن سعد عوفی کہتے ہیں کہ میں نے عبداللہ بن عمر (رض) کے سامنے : الله الذي خلقکم من ضعف اللہ وہی ہے جس نے تمہیں کمزوری کی حالت میں پیدا کیا (سورۃ الروم : ٥٤) (ضاد کے زبر کے ساتھ) پڑھا تو انہوں نے کہا مِنْ ضُعْفٍ (ضاد کے پیش کے ساتھ) ہے میں نے بھی اسی طرح رسول اللہ ﷺ کے سامنے پڑھا تھا جیسے تم نے پڑھا ہے تو آپ ﷺ نے میری گرفت فرمائی جیسے میں نے تمہاری گرفت کی ہے۔ تخریج دارالدعوہ : سنن الترمذی/القراء ات سورة الروم ٤ (٢٩٣٦) ، (تحفة الأشراف : ٧٣٣٤) ، وقد أخرجہ : مسند احمد (٢/٥٨) (حسن )