Abu Dawood

ابو سعید خدری (رض) کہتے ہیں رسول اللہ ﷺ جب کوئی نیا کپڑا پہنتے تو قمیص یا عمامہ (کہہ کر) اس کپڑے کا نام لیتے پھر فرماتے : اللهم لک الحمد أنت کسوتنيه أسألک من خيره وخير ما صنع له وأعوذ بک من شره وشر ما صنع له اے اللہ ! سب تعریفیں تیرے لیے ہیں تو نے ہی مجھے پہنایا ہے، میں تجھ سے اس کی بھلائی اور جس کے لیے یہ کپڑا بنایا گیا ہے اس کی بھلائی کا سوال کرتا ہوں اور اس کی برائی اور جس کے لیے یہ بنایا گیا ہے اس کی برائی سے تیری پناہ چاہتا ہوں ۔ ابونضرہ کہتے ہیں : نبی اکرم ﷺ کے اصحاب میں سے جب کوئی نیا کپڑا پہنتا تو اس سے کہا جاتا : تو اسے پرانا کرے اور اللہ تجھے اس کی جگہ دوسرا کپڑا عطا کرے۔ تخریج دارالدعوہ : سنن الترمذی/اللباس ٢٩ (١٧٦٧) ، سنن النسائی/ الیوم واللیلة (٣١٠) ، (تحفة الأشراف : ٤٣٢٦) ، وقد أخرجہ : مسند احمد (٣/٣٠، ٥٠) (صحیح )

اس سند سے بھی جریری سے اسی جیسی حدیث مروی ہے۔ تخریج دارالدعوہ : انظر ما قبلہ، (تحفة الأشراف : ٤٣٢٦) (صحیح )

اس سند سے بھی جریری سے اسی مفہوم کی حدیث مروی ہے ابوداؤد کہتے ہیں : عبدالوہاب ثقفی نے اس میں ابوسعید کا ذکر نہیں کیا ہے اور حماد بنطسلمہ نے جریری سے جریری نے ابوالعلاء سے ابوالعلاء نے نبی اکرم ﷺ سے روایت کیا ہے۔ ابوداؤد کہتے ہیں : حماد بن سلمہ اور ثقفی دونوں کا سماع ایک ہی ہے۔ تخریج دارالدعوہ : انظر حدیث رقم : (٤٠٢٠) ، (تحفة الأشراف : ٤٣٢٦) (صحیح )

معاذ بن انس (رض) روایت کرتے ہیں کہ رسول اللہ ﷺ نے فرمایا : جس نے کھانا کھایا پھر یہ دعا پڑھی الحمد لله الذي أطعمني هذا الطعام ورزقنيه من غير حول مني ولا قوة تمام تعریفیں اس اللہ کے لیے ہیں جس نے مجھے یہ کھانا کھلایا اور بغیر میری طاقت و قوت کے مجھے یہ عنایت فرمایا تو اس کے اگلے اور پچھلے سارے گناہ بخش دئیے جائیں گے ۔ نیز فرمایا : اور جس نے (نیا کپڑا) پہنا پھر یہ دعا پڑھی : الحمد لله الذي کساني هذا الثوب ورزقنيه من غير حول مني ولا قوة تمام تعریفیں اللہ کے لیے ہیں جس نے مجھے یہ کپڑا پہنایا اور میری طاقت و قوت کے بغیر مجھے یہ عنایت فرمایا تو اس کے اگلے اور پچھلے سارے گناہ بخش دئیے جائیں گے ۔ تخریج دارالدعوہ : سنن الترمذی/الدعوات ٥٦ (٣٤٥٨) ، سنن ابن ماجہ/الأطعمة ١٦ (٣٢٨٥) ، (تحفة الأشراف : ١١٢٩٧) ، وقد أخرجہ : مسند احمد (٣/٤٣٩) ، سنن الدارمی/الاستئذان ٥٥ (٢٧٣٢) (حسن) دون زیادة : ” وما تأخر “ في الموضعین

ام خالد بنت خالد بن سعید بن عاص (رض) فرماتی ہیں کہ رسول اللہ ﷺ کے پاس کچھ کپڑے آئے جن میں ایک چھوٹی سی دھاری دار چادر تھی تو آپ ﷺ نے فرمایا : تم لوگ کس کو اس کا زیادہ حقدار سمجھتے ہو ؟ تو لوگ خاموش رہے، آپ ﷺ نے فرمایا : ام خالد کو میرے پاس لاؤ چناچہ وہ لائی گئیں، آپ نے انہیں اسے پہنا دیا پھر دو بار فرمایا : پہن پہن کر اسے پرانا اور بوسیدہ کرو آپ چادر کی دھاریوں کو جو سرخ یا زرد رنگ کی تھیں دیکھتے جاتے تھے اور فرماتے جاتے تھے : اے ام خالد ! سناه سناه اچھا ہے اچھا ہے ١ ؎۔ تخریج دارالدعوہ : صحیح البخاری/الجھاد ١٨٨ (٣٠٧١) ، المناقب ٣٧ (٣٨٧٤) ، اللباس ٢٢ (٥٨٢٣) ، الأدب ١٧ (٥٩٩٣) ، (تحفة الأشراف : ١٥٧٧٩) ، وقد أخرجہ : مسند احمد (٦/٣٦٥) (صحیح ) وضاحت : ١ ؎ : سناہ حبشی زبان میں اچھا کے معنی میں ہے۔

ام المؤمنین ام سلمہ (رض) کہتی ہیں کپڑوں میں رسول اللہ ﷺ کو سب سے زیادہ قمیص پسند تھی۔ تخریج دارالدعوہ : سنن الترمذی/اللباس ٢٨ (١٧٦٣) ، (تحفة الأشراف : ١٨١٦٩) ، وقد أخرجہ : سنن ابن ماجہ/اللباس ٨ (٣٥٧٥) ، مسند احمد (٣٠٦، ٣١٧، ٣١٨، ٣٢١) (صحیح )

ام المؤمنین ام سلمہ (رض) کہتی ہیں رسول اللہ ﷺ کو قمیص سے زیادہ کوئی اور کپڑا پسند نہ تھا۔ تخریج دارالدعوہ : انظر ما قبلہ (تحفة الأشراف : ١٨١٦٩) (صحیح )

اسماء بنت یزید (رض) کہتی ہیں رسول اللہ ﷺ کے قمیص (کرتے) کی آستین پہنچوں تک تھی۔ تخریج دارالدعوہ : سنن الترمذی/اللباس ٢٨ (١٧٦٥) ، (تحفة الأشراف : ١٥٧٦٥) (ضعیف) (سند میں شہر بن حوشب حافظہ کے کمزور راوی ہیں )

مسور بن مخرمہ (رض) کہتے ہیں رسول اللہ ﷺ نے کچھ ق بائیں تقسیم کیں اور مخرمہ کو کچھ نہیں دیا تو مخرمہ (رض) نے کہا : بیٹے ! مجھے رسول اللہ ﷺ کے پاس لے چلو چناچہ میں ان کے ساتھ چلا (جب وہاں پہنچے) تو انہوں نے مجھ سے کہا : اندر جاؤ اور رسول اللہ ﷺ کو میرے لیے بلا لاؤ، تو میں نے آپ کو بلایا، آپ باہر نکلے، آپ انہیں قباؤں میں سے ایک قباء پہنے ہوئے تھے، آپ ﷺ نے (مخرمہ (رض) سے) فرمایا : میں نے اسے تمہارے لیے چھپا کر رکھ لیا تھا تو مخرمہ (رض) نے نظر اٹھا کر اسے دیکھا آپ نے فرمایا : مخرمہ خوش ہوگیا ۔ تخریج دارالدعوہ : صحیح البخاری/الہبة ١٩ (٢٥٩٩) ، الشہادات ١١ (٢١٢٧) ، الخمس ١١ (٣١٢٧) ، اللباس ١٢ (٥٨٠٠) ، ٤٢ (٥٨٦٢) ، الأدب ٨٢ (٦١٣٢) ، صحیح مسلم/الزکاة ٤٤ (١٠٥٨) ، سنن الترمذی/الأدب ٥٣ (٢٨١٨) ، سنن النسائی/الزینة ٤٥ (٥٣٢٦) ، (تحفة الأشراف : ١١٢٦٨) ، وقد أخرجہ : مسند احمد (٤/٣٢٨) (صحیح )

عبداللہ بن عمر (رض) کہتے ہیں کہ جس نے شہرت اور ناموری کا لباس پہنا اللہ تعالیٰ قیامت کے دن اسے اسی طرح کا لباس پہنائے گا۔ شریک کی روایت میں ہے ابن عمر (رض) اسے مرفوع کرتے ہیں یعنی اپنے قول کے بجائے نبی اکرم ﷺ کا قول قرار دیتے ہیں نیز ابوعوانہ سے یہ اضافہ مروی ہے کہ پھر اس کپڑے میں آگ لگا دی جائے گی ۔ تخریج دارالدعوہ : سنن ابن ماجہ/اللباس ٢٤ (٣٦٠٦) ، (تحفة الأشراف : ٧٤٦٤) ، وقد أخرجہ : مسند احمد (٢/٩٢، ١٣٩) (حسن )