ابو سعید خدری (رض) کہتے ہیں کہ مروان عید کے روز منبر لے کر گئے اور نماز سے پہلے خطبہ شروع کردیا تو ایک شخص کھڑا ہوا اور اس نے کہا : مروان ! آپ نے خلاف سنت کام کیا ہے، ایک تو آپ عید کے روز منبر لے کر گئے حالانکہ اس دن منبر نہیں لے جایا جاتا تھا، دوسرے آپ نے نماز سے پہلے خطبہ شروع کردیا، تو ابو سعید خدری (رض) نے پوچھا : یہ کون ہے ؟ لوگوں نے کہا : فلاں بن فلاں ہے اس پر انہوں نے کہا : اس شخص نے اپنا حق ادا کردیا، میں نے رسول اللہ ﷺ کو فرماتے ہوئے سنا ہے کہ جو تم میں سے کوئی منکر دیکھے اور اسے اپنے ہاتھ سے مٹا سکے تو اپنے ہاتھ سے مٹائے اور اگر ہاتھ سے نہ ہو سکے تو اپنی زبان سے مٹائے اور اگر یہ بھی نہ ہو سکے تو دل سے اسے برا جانے اور یہ ایمان کا ادنی درجہ ہے۔ تخریج دارالدعوہ : صحیح مسلم/الإیمان ٢٠ (٤٩) ، سنن الترمذی/الفتن ١١ (٢١٧٢) ، سنن النسائی/الإیمان ١٧ (٥٠١١، ٥٠١٢) ، سنن ابن ماجہ/إقامة الصلاة ١٥٥ (١٢٧٥) ، (تحفة الأشراف : ٤٠٨٥) ، وقد أخرجہ : مسند احمد (٣/١٠، ٢٠، ٤٩، ٥٢، ٥٣، ٥٤، ٩٢) ، وأعادہ المصنف فی الملاحم (٤٣٤٠) (صحیح )