ابی بن کعب (رض) کہتے ہیں کہ رسول اللہ ﷺ نے فرمایا : اے ابومنذر ! ١ ؎ کتاب اللہ کی کون سی آیت تمہارے نزدیک سب سے باعظمت ٢ ؎ ہے ؟ ، میں نے عرض کیا : اللہ اور اس کے رسول زیادہ جانتے ہیں، آپ ﷺ نے پھر فرمایا : ابومنذر ! کتاب اللہ کی کون سی آیت تمہارے نزدیک سب سے بڑی ہے ؟ ، میں نے عرض کیا : الله لا إله إلا هو الحي القيوم ، تو آپ ﷺ نے میرے سینے کو تھپتھپایا اور فرمایا : اے ابومنذر ! تمہیں علم مبارک ہو ۔ تخریج دارالدعوہ : صحیح مسلم/المسافرین ٤٤ (٨١٠) ، (تحفة الأشراف : ٣٨) ، وقد أخرجہ : مسند احمد (٥/١٤١) (صحیح ) وضاحت : ١ ؎ : ابی بن کعب (رض) کی کنیت ہے۔ ٢ ؎ : باعظمت سے مراد الفاظ کی کثرت ہے اور ایک قول یہ ہے کہ اس سے معانی کی عظمت مراد ہے یعنی اس آیت کے معنی بہت عظیم ہیں نیز ایک قول یہ بھی ہے کہ اس سے درجہ کی بڑائی مراد ہے یعنی اس آیت کا درجہ بڑا ہے کیونکہ اس میں اللہ کی عظمت، اس کی وحدانیت اور اس کی صفات کاملہ کا ذکر ہے۔