معاویہ بن حیدہ (رض) کہتے ہیں رسول اللہ ﷺ نے فرمایا : چرنے والے اونٹوں میں چالیس (٤٠) میں ایک (١) بنت لبون ہے، (زکاۃ بچانے کے خیال سے) اونٹ اپنی جگہ سے ادھر ادھر نہ کئے جائیں، جو شخص ثواب کی نیت سے زکاۃ دے گا اسے اس کا اجر ملے گا، اور جو اسے روکے گا ہم اس سے اسے وصول کرلیں گے، اور (زکاۃ روکنے کی سزا میں) اس کا آدھا مال لے لیں گے، یہ ہمارے رب عزوجل کے تاکیدی حکموں میں سے ایک تاکیدی حکم ہے، آل محمد کا اس میں کوئی حصہ نہیں ١ ؎۔ تخریج دارالدعوہ : سنن النسائی/الزکاة ٤ (٢٤٤٦) ، ٧ (٢٤٥١) ، ( تحفة الأشراف : ١١٣٨٤) ، وقد أخرجہ : مسند احمد (٥/٢، ٤) ، سنن الدارمی/الزکاة ٣٦ (١٧١٩) (حسن ) وضاحت : ١ ؎ : جرمانے کا یہ حکم ابتدائے اسلام میں تھا، بعد میں منسوخ ہوگیا، اکثر علماء کے قول کے مطابق یہی راجح مسلک ہے۔