ابوہریرہ (رض) کہتے ہیں کہ جب اللہ تعالیٰ نے رسول اللہ ﷺ کو مکہ فتح کرا دیا، تو آپ لوگوں میں کھڑے ہوئے، اللہ کی حمد و ثنا بیان کی پھر فرمایا : اللہ نے ہی مکہ سے ہاتھیوں کو روکا، اور اس پر اپنے رسول اور مومنین کا اقتدار قائم کیا، میرے لیے دن کی صرف ایک گھڑی حلال کی گئی اور پھر اب قیامت تک کے لیے حرام کردی گئی، نہ وہاں (مکہ) کا درخت کاٹا جائے، نہ اس کا شکار بدکایا جائے، اور نہ وہاں کا لقطہٰ (پڑی ہوئی چیز) کسی کے لیے حلال ہے، بجز اس کے جو اس کی تشہیر کرے ، اتنے میں عباس (رض) نے کہا : اللہ کے رسول ! سوائے اذخر کے ١ ؎ (یعنی اس کا کاٹنا درست ہونا چاہیئے) اس لیے کہ وہ ہماری قبروں اور گھروں میں استعمال ہوتی ہے، رسول اللہ ﷺ نے فرمایا : سوائے اذخر کے ۔ ابوداؤد کہتے ہیں : ابن مصفٰی نے ولید سے اتنا اضافہ کیا ہے : تو اہل یمن کے ایک شخص ابوشاہ کھڑے ہوئے اور عرض کیا : اللہ کے رسول ! مجھے لکھ کر دے دیجئیے، رسول اللہ ﷺ نے فرمایا : ابو شاہ کو لکھ کر دے دو ، (ولید کہتے ہیں) میں نے اوزاعی سے پوچھا : اکتبوا لأبي شاه سے کیا مراد ہے، وہ بولے : یہی خطبہ ہے جو انہوں نے رسول اللہ ﷺ سے سنا۔ تخریج دارالدعوہ : صحیح البخاری/اللقطة ٧ (٢٤٣٤) ، صحیح مسلم/الحج ٨٢ (١٣٥٥) ، سنن الترمذی/الدیات ١٣ (١٤٠٥) ، سنن النسائی/القسامة ٢٤ (٤٧٨٩، ٤٧٩٠، ٤٧٩١) ، سنن ابن ماجہ/الدیات ٣ (٢٦٢٤) ، (تحفة الأشراف : ١٥٣٨٣) ، وقد أخرجہ : مسند احمد (٢/٢٣٨) ، سنن الدارمی/البیوع ٦٠ (٢٦٤٢) ، ویأتی ہذا الحدیث فی العلم (٣٦٤٩، ٣٦٥٠) وفی الدیات (٤٥٠٥) (صحیح ) وضاحت : ١ ؎ : یہ ایک خوشبو دار گھاس ہے۔