علی (رض) کہتے ہیں کہ ہم نے رسول اللہ ﷺ سے سوائے قرآن کے اور اس کے جو اس صحیفے ١ ؎ میں ہے کچھ نہیں لکھا، رسول اللہ ﷺ نے فرمایا : مدینہ حرام ہے عائر سے ثور تک (عائر اور ثور دو پہاڑ ہیں) ، جو شخص مدینہ میں کوئی بدعت (نئی بات) نکالے، یا نئی بات نکالنے والے کو پناہ اور ٹھکانا دے تو اس پر اللہ، ملائکہ اور تمام لوگوں کی لعنت ہے، نہ اس کا فرض قبول ہوگا اور نہ کوئی نفل، مسلمانوں کا ذمہ (عہد) ایک ہے (مسلمان سب ایک ہیں اگر کوئی کسی کو امان دیدے تو وہ سب کی طرف سے ہوگی) اس (کو نبھانے) کی ادنی سے ادنی شخص بھی کوشش کرے گا، لہٰذا جو کسی مسلمان کی دی ہوئی امان کو توڑے تو اس پر اللہ، ملائکہ اور تمام لوگوں کی لعنت ہے، نہ اس کا فرض قبول ہوگا اور نہ نفل، اور جو اپنے مولی کی اجازت کے بغیر کسی قوم سے ولاء کرے ٢ ؎ اس پر اللہ، ملائکہ اور تمام لوگوں کی لعنت ہے، نہ اس کا فرض قبول ہوگا اور نہ نفل ۔ تخریج دارالدعوہ : صحیح البخاری/العلم ٣٩ (١١١) ، و فضائل المدینة ١ (١٨٦٧) ، والجھاد ١٧١ (٣٠٤٧) ، والجزیة ١٠ (٣١٧٢، ٣١٧٩) ، والفرائض ٢١ (٦٧٥٥) ، والدیات ٢٤ (٦٩٠٣) ، والاعتصام ٥ (٧٣٠٠) ، صحیح مسلم/الحج ٨٥ (١٣٧٠) ، سنن الترمذی/الدیات ١٦ (١٤١٢) ، والولاء والھبة ٣ (٢١٢٧) ، سنن النسائی/القسامة ٩، ١٠ (٤٧٤٩) ، (تحفة الأشراف : ١٠٣١٧) ، وقد أخرجہ : سنن ابن ماجہ/الدیات ٢١ (٢٦٥٨) ، مسند احمد (١/٨١، ١٢٢، ١٢٦، ١٥١، ٢/٣٩٨) ، سنن الدارمی/الدیات ٥ (٢٤٠١) (صحیح ) وضاحت : ١ ؎ : یہ صحیفہ ایک ورق تھا جس میں دیت کے احکام تھے ، علی (رض) اسے اپنی تلوار کی نیام میں رکھتے تھے۔ ٢ ؎ : یعنی کوئی اپنی آزادی کی نسبت کسی دوسرے کی طرف نہ کرے۔