حبیبہ بنت سہل انصاریہ (رض) سے روایت ہے کہ وہ ثابت بن قیس بن شماس (رض) کے نکاح میں تھیں، ایک بار کیا ہوا کہ رسول اللہ ﷺ فجر پڑھنے کے لیے نکلے تو آپ نے حبیبہ بنت سہل کو اندھیرے میں اپنے دروازے پر پایا، آپ ﷺ نے پوچھا : کون ہے ؟ بولیں : میں حبیبہ بنت سہل ہوں، آپ ﷺ نے فرمایا : کیا بات ہے ؟ وہ اپنے شوہر ثابت بن قیس کے متعلق بولیں کہ میرا ان کے ساتھ گزارا نہیں ہوسکتا، پھر جب ثابت بن قیس آئے تو رسول اللہ ﷺ نے ان سے فرمایا : یہ حبیبہ بنت سہل ہیں انہوں نے مجھ سے بہت سی باتیں جنہیں اللہ نے چاہا ذکر کی ہیں ، حبیبہ کہنے لگیں : اللہ کے رسول ! انہوں نے جو کچھ مجھے (مہر وغیرہ) دیا تھا وہ سب میرے پاس ہے، چناچہ آپ ﷺ نے ثابت بن قیس سے کہا : اس (مال) میں سے لے لو ، تو انہوں نے اس میں سے لے لیا اور وہ اپنے گھر والوں کے پاس بیٹھی رہیں ١ ؎۔ تخریج دارالدعوہ : سنن النسائی/الطلاق ٣٤ (٣٤٩٢) ، (تحفة الأشراف : ١٥٧٩٢) ، وقد أخرجہ : موطا امام مالک/الطلاق ١١(٣١) ، مسند احمد (٦/٤٣٤) ، سنن الدارمی/الطلاق ٧ (٢٣١٧) (صحیح ) وضاحت : ١ ؎ : یہی اسلام میں پہلا خلع تھا ، خلع سے نکاح منسوخ ہوجاتا ہے، خلع کی عدت ایک حیض ہے، بعض علماء کے نزدیک خلع سے ایک طلاق پڑجاتی ہے، اس لئے ان لوگوں کے نزدیک اس کی عدت طلاق کی عدت کی طرح ہے ، یعنی تین حیض ہے ، پہلا قول راجح ہے۔