ابوہریرہ (رض) سے روایت ہے کہ جس وقت آیت لعان نازل ہوئی انہوں نے رسول اللہ ﷺ کو فرماتے سنا : جس عورت نے کسی قوم میں ایسے فرد کو شامل کردیا جو حقیقت میں اس قوم کا فرد نہیں ہے، تو وہ اللہ کی رحمت سے دور رہے گی، اسے اللہ تعالیٰ جنت میں ہرگز داخل نہ کرے گا، اسی طرح جس شخص نے اپنے بچے کا انکار کیا حالانکہ اسے معلوم ہے کہ وہ اس کا بچہ ہے، اسے اللہ تعالیٰ کا دیدار نصیب نہ ہوگا، اور وہ اگلی پچھلی ساری مخلوق کے سامنے اسے رسوا کرے گا ١ ؎۔ تخریج دارالدعوہ : سنن النسائی/الطلاق ٤٧ (٣٥١١) ، سنن ابن ماجہ/الفرائض ١٣ (٢٧٤٣) ، (تحفة الأشراف : ١٢٩٧٢) ، وقد أخرجہ : سنن الدارمی/ النکاح ٤٢ (٢٢٨٤) (ضعیف) (اس کے راوی عبد اللہ بن یونس مجہول ہیں ) وضاحت : ١ ؎ : حاصل یہ ہے کہ نہ عورت کو چاہیے کہ حرام کا بچہ کسی غیر سے جن کر اس کو اپنے خاوند کی طرف منسوب کرے اور نہ مرد کو چاہیے کہ دیدہ و دانستہ اپنے بچے کا انکار کرے اور عورت پر زنا کی تہمت لگائے۔