ابوسلمہ بن عبدالرحمٰن بن عوف الزہری کہتے ہیں کہ فاطمہ بنت قیس (رض) نے انہیں خبر دی کہ وہ ابوحفص بن مغیرہ (رض) کے عقد میں تھیں، اور ابوحفص نے انہیں تین طلاق میں سے آخری طلاق بھی دے دی تو وہ رسول اللہ ﷺ کی خدمت میں حاضر ہوئیں اور اپنے گھر نکلنے کے متعلق آپ ﷺ سے فتویٰ پوچھا تو آپ نے انہیں نابینا ابن ام مکتوم (رض) کے گھر منتقل ہوجانے کا حکم دیا ١ ؎۔ مروان نے یہ حدیث سنی تو مطلقہ کے گھر سے نکلنے کے سلسلہ میں فاطمہ (رض) کی حدیث کی تصدیق کرنے سے انکار کیا، عروہ کہتے ہیں : ام المؤمنین عائشہ (رض) نے بھی فاطمہ بنت قیس (رض) کی بات کا انکار کیا۔ تخریج دارالدعوہ : انظر حدیث رقم (٢٢٨٤) ، (تحفة الأشراف : ١٨٠٣٨) (صحیح ) وضاحت : ١ ؎ : مطلقہ کا عدت گزارنے کے لئے گھر سے نکل کر کسی اور جگہ رہنا درست نہیں ہے، الا یہ کہ کوئی سخت ضرورت لاحق ہوجائے مثلا کرائے کا مکان ہو، اور کرایہ دینے کی طاقت نہ ہو، یا مکان گرپڑے، یا مالک مکان جبرا نکال دے، یا علاج و معالجہ کی ضرورت ہو، یا کوئی دیکھ بھال کرنے والا نہ ہو۔