براء (رض) کہتے ہیں کہ رسول اللہ ﷺ نے جنگ احد میں عبداللہ بن جبیر (رض) کو تیر اندازوں کا امیر بنایا ان کی تعداد پچاس تھی اور فرمایا : اگر تم دیکھو کہ ہم کو پرندے اچک رہے ہیں پھر بھی اپنی اس جگہ سے نہ ہٹنا یہاں تک کہ میں تمہیں بلاؤں اور اگر تم دیکھو کہ ہم نے کافروں کو شکست دے دی ہے، انہیں روند ڈالا ہے، پھر بھی اس جگہ سے نہ ہٹنا، یہاں تک کہ میں تمہیں بلاؤں ، پھر اللہ تعالیٰ نے کافروں کو شکست دی اور اللہ کی قسم میں نے مشرکین کی عورتوں کو دیکھا کہ بھاگ کر پہاڑوں پر چڑھنے لگیں، عبداللہ بن جبیر کے ساتھی کہنے لگے : لوگو ! غنیمت، غنیمت، تمہارے ساتھی غالب آگئے تو اب تمہیں کس چیز کا انتظار ہے ؟ اس پر عبداللہ بن جبیر (رض) نے کہا : کیا تم وہ بات بھول گئے جو تم سے رسول اللہ ﷺ نے کہی ہے ؟ تو ان لوگوں نے کہا : اللہ کی قسم ! ہم ضرور مشرکین کے پاس جائیں گے اور مال غنیمت لوٹیں گے، چناچہ وہ ہٹ گئے تو اللہ نے ان کے منہ پھیر دئیے اور وہ شکست کھا کر واپس آئے۔ تخریج دارالدعوہ : صحیح البخاری/الجھاد ١٦٤ (٣٠٣٩) ، والمغازي ١٠ (٣٩٨٦) ، والتفسیر ١٠ (٤٥٦١) ، (تحفة الأشراف : ١٨٣٧) ، وقد أخرجہ : مسند احمد (٤/٢٩٤) (صحیح )