ابوثعلبہ خشنی (رض) کہتے ہیں کہ رسول اللہ ﷺ نے شکاری کتے کے سلسلہ میں فرمایا : جب تم اپنے (شکاری) کتے کو چھوڑو، اور اللہ کا نام لے کر (یعنی بسم اللہ کہہ) کر چھوڑو تو (اس کا شکار) کھاؤ اگرچہ وہ اس میں سے کھالے ١ ؎ اور اپنے ہاتھ سے کیا ہوا شکار کھاؤ ١ ؎۔ تخریج دارالدعوہ : تفرد بہ أبو داود، وانظر ما یأتي برقم : (٢٨٥٥) ، (تحفة الأشراف : ١١٨٧٨) (منکر) (اس میں وإن أَکَلَ مِنْہ کا جملہ منکر ہے اور کسی راوی کے یہاں نہیں ہے، مسند احمد میں اس کی جگہ وإنّ قَتَلَ (اگرچہ قتل کر ڈالا ہو) کا جملہ ہے ، اور یہ حدیث عدی (رض) کی حدیث کے مطابق ہے وضاحت : ١ ؎ : ابوثعلبہ خشنی (رض) کی اس حدیث اور عدی بن حاتم (رض) کی روایت کردہ اس سے ماقبل کی حدیث کے مابین تطبیق کی صورت یہ ہے کہ ابوثعلبہ (رض) کی روایت کو بیان جواز پر، اور عدی بن حاتم (رض) کی روایت کو نہی تنزیہی پر محمول کیا جائے گا، ایک تاویل یہ بھی کی جاتی ہے کہ عدی بن حاتم (رض) کی حدیث حرمت کے سلسلہ میں اصل ہے، اور ابوثعلبہ (رض) کی روایت میں وإن أكل کے معنی ہیں اگرچہ وہ اس سے پہلے کھاتا رہا ہو مگر اس شکار میں اس نے نہ کھایا ہو۔