ام المؤمنین عائشہ (رض) کہتی ہیں کہ ام حبیبہ بنت حجش (رض) کو رسول اللہ ﷺ کے زمانے میں استحاضہ کی شکایت ہوئی، تو آپ ﷺ نے انہیں ہر نماز کے لیے غسل کرنے کا حکم دیا، اور پھر راوی نے پوری حدیث بیان کی۔ ابوداؤد کہتے ہیں : اسے ابوالولید طیالسی نے روایت کیا ہے لیکن اسے میں نے ان سے نہیں سنا ہے، انہوں نے سلیمان بن کثیر سے، سلیمان نے زہری سے، زہری نے عروہ سے اور عروہ نے ام المؤمنین عائشہ (رض) سے روایت کی ہے، وہ کہتی ہیں : ام المؤمنین زینب بنت حجش (رض) کو استحاضہ ہوا تو نبی اکرم ﷺ نے ان سے فرمایا : تم ہر نماز کے لیے غسل کرلیا کرو ، پھر راوی نے پوری حدیث بیان کی۔ ابوداؤد کہتے ہیں : نیز اسے عبدالصمد نے سلیمان بن کثیر سے روایت کیا ہے، اس میں ہے کہ آپ ﷺ نے فرمایا : تم ہر نماز کے لیے وضو کرو ۔ ابوداؤد کہتے ہیں : یہ عبدالصمد کا وہم ہے اور اس سلسلے میں ابوالولید کا قول ہی صحیح ہے۔ تخریج دارالدعوہ : تفرد بہ أبو داود (تحفة الأشراف : ١٦٦١٠، ١٦٤٦٠) ، وقد أخرجہ : مسند احمد (٦/٢٣٧) (صحیح )