رافع بن خدیج (رض) کہتے ہیں کہ رسول اللہ ﷺ نے فرمایا : سینگی (پچھنا) لگانے والے کی کمائی بری (غیر شریفانہ) ہے ١ ؎ کتے کی قیمت ناپاک ہے اور زانیہ عورت کی کمائی ناپاک (یعنی حرام) ہے ۔ تخریج دارالدعوہ : صحیح مسلم/المساقاة ٩ (١٥٦٨) ، سنن الترمذی/البیوع ٤٦ (١٢٧٥) ، سنن النسائی/الذبائح ١٥ (٤٢٩٩) ، (تحفة الأشراف : ٣٥٥٥) ، وقد أخرجہ : مسند احمد (٣/٤٦٤، ٤٦٥، ٤/١٤١) (صحیح ) وضاحت : ١ ؎ : كسب الحجام خبيث میں خبيث کا لفظ حرام ہونے کے مفہوم میں نہیں ہے بلکہ گھٹیا اور غیر شریفانہ ہونے کے معنی میں ہے جیسا کہ رسول اللہ ﷺ نے آنے والی حدیث نمبر : (٣٤٢٢) میں محیصہ (رض) کو یہ حکم دیا کہ پچھنا لگانے کی اجرت سے اپنے اونٹ اور غلام کو فائدہ پہنچاؤ ، نیز آپ ﷺ نے بذات خود پچھنا لگوایا اور لگانے والے کو اس کی اجرت بھی دی ، پس پچھنا لگانے والے کی کمائی کے متعلق خبيث کا لفظ ایسے ہی ہے جیسے آپ نے ثوم وبصل (لہسن ، پیاز) کو خبيث کہا باوجود یہ کہ ان دونوں کا استعمال حرام نہیں ہے ، اسی طرح حجام کی کمائی بھی حرام نہیں ہے یہ اور بات ہے کہ غیر شریفانہ ہے۔