ابن ابی ملیکہ کہتے ہیں کہ مجھ سے عقبہ بن حارث نے اور میرے ایک دوست نے انہیں کے واسطہ سے بیان کیا اور مجھے اپنے دوست کی روایت زیادہ یاد ہے وہ (عقبہ) کہتے ہیں : میں نے ام یحییٰ بنت ابی اہاب سے شادی کی، پھر ہمارے پاس ایک کالی عورت آ کر بولی : میں نے تم دونوں (میاں، بیوی) کو دودھ پلایا ہے ١ ؎، میں نبی اکرم ﷺ کی خدمت میں حاضر ہوا اور آپ سے اس واقعہ کا ذکر کیا تو آپ ﷺ نے مجھ سے چہرہ پھیرلیا، میں نے عرض کیا : اللہ کے رسول ! وہ عورت جھوٹی ہے، آپ ﷺ نے فرمایا : تمہیں کیا معلوم ؟ اسے جو کہنا تھا اس نے کہہ دیا، تم اسے اپنے سے علیحدہ کر دو ۔ تخریج دارالدعوہ : خ العلم ٢٦ (٨٨) ، البیوع ٣ (٢٠٥٢) ، الشھادات ٤ (٢٦٤٠) ، ١٣ (٢٦٥٩) ، ١٤ (٢٦٦٠) ، النکاح ٢٣ (٥١٠٤) ، سنن الترمذی/الرضاع ٤ (١١٥١) ، سنن النسائی/النکاح ٥٧ (٣٣٣٢) ، (تحفة الأشراف : ٩٩٠٥) ، وقد أخرجہ : مسند احمد (٤/٧، ٨، ٣٨٤) ، سنن الدارمی/النکاح ٥١ (٢٣٠١) (صحیح ) وضاحت : ١ ؎ : اس حدیث سے معلوم ہوا کہ رضاعت کے ثبوت کے لیے ایک مرضعہ (دودھ پلانے والی) کی گواہی کافی ہے۔