عبداللہ بن عمر (رض) کہتے ہیں کہ عمر بن خطاب (رض) نے مسجد کے دروازے کے پاس ایک دھاری دار ریشمی جوڑا بکتا ہوا دیکھا تو عرض کیا : اللہ کے رسول ! اگر آپ اس کو خرید لیتے اور جمعہ کے روز اور وفود سے ملاقات کے وقت اسے زیب تن فرماتے (تو اچھا ہوتا) ، رسول اللہ ﷺ نے فرمایا : اسے وہی پہنے گا جس کا آخرت میں کوئی حصہ نہیں پھر انہیں میں سے کچھ جوڑے رسول اللہ ﷺ کے پاس آئے آپ نے اس میں سے ایک جوڑا عمر بن خطاب کو دیا، تو عمر کہنے لگے : اللہ کے رسول ! یہ آپ مجھے پہنا رہے ہیں حالانکہ آپ عطارد کے جوڑوں کے سلسلہ میں ایسا ایسا فرما چکے ہیں ؟ تو رسول اللہ ﷺ نے فرمایا : میں نے تمہیں اس لیے نہیں دیا ہے کہ اسے تم (خود) پہنو تو عمر بن خطاب (رض) نے اسے اپنے ایک مشرک بھائی (عثمان بن حکیم) کو دے دیا۔ تخریج دارالدعوہ : انظر حدیث رقم : (١٠٧٦) ، (تحفة الأشراف : ٨٣٣٥) (صحیح )