عبداللہ بن عمر (رض) کہتے ہیں کہ رسول اللہ ﷺ نے سونے کی انگوٹھی بنائی، اس کے نگینہ کو اپنی ہتھیلی کے پیٹ کی جانب رکھا اور اس میں محمد رسول الله کندہ کرایا، تو لوگوں نے بھی سونے کی انگوٹھیاں بنوا لیں، جب آپ نے انہیں سونے کی انگوٹھیاں پہنے دیکھا تو اسے پھینک دیا، اور فرمایا : اب میں کبھی اسے نہیں پہنوں گا پھر آپ ﷺ نے چاندی کی ایک انگوٹھی بنوائی جس میں محمد رسول الله کندہ کرایا، پھر آپ کے بعد وہی انگوٹھی ابوبکر (رض) نے پہنی، پھر ابوبکر (رض) کے بعد عمر (رض) نے پھر ان کے بعد عثمان (رض) نے پہنی یہاں تک کہ وہ بئراریس میں گر پڑی۔ ابوداؤد کہتے ہیں : عثمان سے لوگوں کا اختلاف اس وقت تک نہیں ہوا جب تک انگوٹھی ان کے ہاتھ میں رہی (جب وہ گرگئی تو پھر اختلافات اور فتنے رونما ہونے شروع ہوگئے) ۔ تخریج دارالدعوہ : صحیح البخاری/اللباس ٤٥ (٥٨٦٦) ، الأیمان والنذور ٦ (٦٦٥١) ، الاعتصام ٤ (٧٢٩٨) ، (تحفة الأشراف : ٧٨٣٢) ، وقد أخرجہ : صحیح مسلم/اللباس ١٢ (٢٠٩٢) ، سنن الترمذی/الشمائل ١١ (٨٤) ، اللباس ١٦ (١٧٤١) ، سنن النسائی/الزینة ٤٥ (٥١٩٩) ، سنن ابن ماجہ/اللباس ٣٩ (٣٦٣٩) (صحیح )