بریدہ (رض) کہتے ہیں کہ ایک شخص نبی اکرم ﷺ کی خدمت میں آیا، وہ پتیل کی انگوٹھی پہنے ہوئے تھا تو آپ ﷺ نے اس سے فرمایا : کیا بات ہے، میں تجھ سے بتوں کی بدبو محسوس کر رہا ہوں ؟ تو اس نے اپنی انگوٹھی پھینک دی، پھر لوہے کی انگوٹھی پہن کر آیا، تو آپ ﷺ نے فرمایا : کیا بات ہے، میں تجھے جہنمیوں کا زیور پہنے ہوئے دیکھتا ہوں ؟ تو اس نے پھر اپنی انگوٹھی پھینک دی، اور عرض کیا : اللہ کے رسول ! پھر کس چیز کی انگوٹھی بنواؤں ؟ آپ ﷺ نے فرمایا : چاندی کی بنواؤ اور اسے ایک مثقال سے کم رکھو ١ ؎۔ تخریج دارالدعوہ : سنن الترمذی/اللباس ٤٣ (١٧٨٥) ، سنن النسائی/الزینة ٤٤ (٥١٩٨) ، (تحفة الأشراف : ١٩٨٢) ، وقد أخرجہ : مسند احمد (٥/٣٥٩) (ضعیف) (ابوطیبہ عبداللہ بن مسلم کثیرالوہم راوی ہیں ) وضاحت : ١ ؎ : ایک مثقال ساڑھے چار ماشے کا ہوتا ہے اگر اس کے برابر ہوگی تو بھاری اور بد وضع ہوگی یا مردوں کے لئے اس سے زیادہ چاندی کا استعمال درست نہیں۔