عبداللہ بن عمر (رض) کہتے ہیں کہ رسول اللہ ﷺ کے زمانے میں مسجد نبوی کچی اینٹوں اور کھجور کی شاخوں سے بنائی گئی تھی، مجاہد کہتے ہیں : اس کے ستون کھجور کی لکڑی کے تھے، ابوبکر (رض) نے اس میں کسی قسم کا اضافہ نہیں کیا، البتہ عمر (رض) نے اس میں اضافہ کیا، اور اس کی تعمیر رسول اللہ ﷺ کی بنائی ہوئی بنیادوں کے مطابق کچی اینٹوں اور کھجور کی شاخوں سے کی اور اس کے ستون بھی نئی لکڑی کے لگائے، مجاہد کی روایت میں عمده خشبا کے الفاظ ہیں، پھر عثمان (رض) نے اس کی عمارت میں تبدیلی کی اور اس میں بہت سارے اضافے کئے، اس کی دیواریں منقش پتھروں اور گچ (چونا) سے بنوائیں، اس کے ستون منقش پتھروں کے بنوائے اور اس کی چھت ساگوان کی لکڑی کی بنوائی۔ مجاہد کی روایت میں وسقفه الساج کے بجائے وسقفه بالساج ہے۔ ابوداؤد کہتے ہیں : حدیث میں مذکور ( قصة ) کے معنی گچ کے ہیں۔ تخریج دارالدعوہ : صحیح البخاری/الصلاة ٦٢ (٤٤٦) ، (تحفة الأشراف : ٧٦٨٣) ، وقد أخرجہ : مسند احمد (٢/١٣٠) (صحیح )