علی (رض) کہتے ہیں کہ فاطمہ (رض) نبی اکرم ﷺ کے پاس چکی پیسنے سے اپنے ہاتھ میں پہنچنے والی تکلیف کی شکایت لے کر گئیں، اسی دوران رسول اللہ ﷺ کے پاس کچھ قیدی لائے گئے تو وہ آپ کے پاس لونڈی مانگنے آئیں، لیکن آپ نہ ملے تو ام المؤمنین عائشہ (رض) کو بتا کر چلی آئیں، جب رسول اللہ ﷺ تشریف لائے تو عائشہ (رض) نے آپ کو بتایا (کہ فاطمہ آئی تھیں ایک خادمہ مانگ رہی تھیں) یہ سن کر آپ ہمارے پاس تشریف لائے، ہم سونے کے لیے اپنی خواب گاہ میں لیٹ چکے تھے، ہم اٹھنے لگے تو آپ نے فرمایا : اپنی اپنی جگہ پر رہو (اٹھنا ضروری نہیں) چناچہ آپ آ کر ہمارے بیچ میں بیٹھ گئے، یہاں تک کہ میں نے آپ کے قدموں کی ٹھنڈک اپنے سینے میں محسوس کی، آپ نے فرمایا : کیا میں تم دونوں کو اس سے بہتر چیز نہ بتاؤں جو تم نے مانگی ہے، جب تم سونے چلو تو (٣٣) بار سبحان اللہ کہو، (٣٣) بار الحمدللہ کہو، اور (٣٤) بار اللہ اکبر کہو، یہ تم دونوں کے لیے خادم سے بہتر ہے ۔ تخریج دارالدعوہ : صحیح البخاری/فرض الخمس ٦ (٣١١٣) ، المناقب ٩ (٣٧٠٥) ، النفقات ٦ (٥٣٦١) ، صحیح مسلم/الذکر والدعاء ١٩ (٢٧٢٧) ، (تحفة الأشراف : ١٠٢١٠) ، وقد أخرجہ : سنن الترمذی/الدعوات ٢٤ (٣٤٠٨) ، مسند احمد (١/١٤٦) ، سنن الدارمی/الاستئذان ٥٢ (٢٧٢٧) (صحیح )