ابومعمر کہتے ہیں کہ ہم نے خباب (رض) سے پوچھا : کیا رسول اللہ ﷺ ظہر و عصر میں قرآت کرتے تھے ؟ انہوں نے کہا : ہاں (قرآت کرتے تھے) ، ہم نے کہا : آپ لوگوں کو یہ بات کیسے معلوم ہوتی تھی ؟ انہوں نے کہا : آپ کی داڑھی کے ہلنے سے ١ ؎۔ تخریج دارالدعوہ : صحیح البخاری/الأذان ٩١ (٧٤٦) ، ٩٦ (٧٦٠) ، ٩٧، ١٠٨ (٧٧٧) ، سنن ابن ماجہ/إقامة الصلاة ٧ (٨٢٦) ، (تحفة الأشراف : ٣٥١٧) ، وقد أخرجہ : مسند احمد (٥/١٠٩، ١١٠، ١١٢، ٦/٣٩٥) (صحیح ) وضاحت : ١ ؎ : امام بیہقی نے اس حدیث سے اس بات پر استدلال کیا ہے کہ سری قرات میں یہ ضروری ہے کہ آدمی خود کو سنا سکے کیونکہ اضطراب لحية زبان اور دونوں ہونٹ ہلے بغیر ممکن نہیں اگر آدمی اپنے دونوں ہونٹ بند رکھے اور صرف زبان ہلائے تو داڑھی نہیں ہل سکتی اور قرات خود کو نہیں سنا سکتا (فتح الباری، حدیث : ٧٦٠ )