علی بن عبدالرحمٰن معاوی کہتے ہیں عبداللہ بن عمر (رض) نے مجھے نماز میں کنکریوں سے کھیلتے ہوئے دیکھا، جب وہ نماز سے فارغ ہوئے تو مجھے اس سے منع کیا اور کہا : تم نماز میں اسی طرح کرو جیسے رسول اللہ ﷺ کرتے تھے، میں نے عرض کیا : رسول اللہ ﷺ کیسے کرتے تھے ؟ انہوں نے کہا : جب آپ ﷺ نماز میں بیٹھتے تو اپنی داہنی ہتھیلی اپنی داہنی ران پر رکھتے اور اپنی تمام انگلیاں سمیٹ لیتے اور شہادت کی انگلی جو انگوٹھے سے متصل ہوتی ہے، اشارہ کرتے ١ ؎ اور اپنی بائیں ہتھیلی بائیں ران پر رکھتے۔ تخریج دارالدعوہ : صحیح مسلم/المساجد ٢١ (٥٨٠) ، سنن النسائی/التطبیق ٩٨ (١١٦١) ، والسھو ٣٢ (١٢٦٧) ٣٣ (١٢٦٨) ، (تحفة الأشراف : ٧٣٥١) ، وقد أخرجہ : موطا امام مالک/الصلاة ١١(٤٨) ، سنن الدارمی/الصلاة ٨٣ (١٣٧٨) (صحیح ) وضاحت : ١ ؎ : اس سے سلام پھیرنے تک برابر شہادت کی انگلی سے اشارہ کرنے کا ثبوت ملتا ہے، اشارہ کرنے کے بعد انگلی کے گرا لینے یا لا إله پر اٹھانے اور إلا الله پر گرا لینے کی کوئی دلیل حدیث میں نہیں ہے۔