عبدالرحمٰن بن کعب بن مالک اپنے والد کعب بن مالک (رض) سے روایت کرتے ہیں کہ ان کی بصارت چلی جانے کے بعد وہ ان کے راہبر تھے، وہ کہتے ہیں کہ کعب بن مالک (رض) جب جمعہ کے دن اذان سنتے تو اسعد بن زرارہ (رض) کے لیے رحمت کی دعا کرتے، عبدالرحمٰن بن کعب کہتے ہیں کہ میں نے ان سے پوچھا کہ کیا وجہ ہے کہ جب آپ اذان سنتے ہیں تو اسعد بن زرارہ (رض) کے لیے رحمت کی دعا کرتے ہیں ؟ انہوں نے جواب دیا : میں ان کے لیے رحمت کی دعا اس لیے کرتا ہوں کہ یہی وہ پہلے شخص ہیں جنہوں نے ہمیں قبیلہ بنو بیاضہ کے حرہ نقیع الخضمات میں واقع (بستی، گاؤں) ھزم النبیت ١ ؎ میں جمعہ کی نماز پڑھائی، میں نے پوچھا : اس دن آپ لوگ کتنے تھے ؟ کہا : ہم چالیس تھے۔ تخریج دارالدعوہ : سنن ابن ماجہ/إقامة الصلاة ٧٨ (١٠٨٢) ، (تحفة الأشراف : ١١١٤٩) (حسن ) وضاحت : ١ ؎ : مدینہ سے ایک میل کے فاصلہ پر ایک بستی تھی جس کا نام ہزم النبیت تھا۔