عبداللہ بن عباس (رض) کے غلام کریب کہتے ہیں کہ عبداللہ بن عباس، عبدالرحمٰن بن ازہر (رض) اور مسور بن مخرمہ (رض) تینوں نے انہیں ام المؤمنین عائشہ (رض) کے پاس بھیجا اور کہا : ان سے ہم سب کا سلام کہنا اور عصر کے بعد دو رکعت نفل کے بارے میں پوچھنا اور کہنا : ہمیں معلوم ہوا ہے کہ آپ یہ دو رکعتیں پڑھتی ہیں، حالانکہ ہم تک یہ بات پہنچی ہے کہ رسول اللہ ﷺ نے ان سے منع فرمایا ہے، چناچہ میں ام المؤمنین عائشہ (رض) کے پاس گیا اور انہیں ان لوگوں کا پیغام پہنچا دیا، آپ نے کہا : ام المؤمنین ام سلمہ (رض) سے پوچھو ! میں ان لوگوں کے پاس آیا اور ان کی بات انہیں بتادی، تو ان سب نے مجھے ام المؤمنین ام سلمہ کے پاس اسی پیغام کے ساتھ بھیجا، جس کے ساتھ ام المؤمنین عائشہ (رض) کے پاس بھیجا تھا، تو ام المؤمنین ام سلمہ (رض) نے کہا : میں نے رسول اللہ ﷺ کو اس سے منع کرتے ہوئے سنا، پھر دیکھا کہ آپ انہیں پڑھ رہے ہیں، ایک روز آپ نے عصر پڑھی پھر میرے پاس آئے، اس وقت میرے پاس انصار کے قبیلہ بنی حرام کی کچھ عورتیں بیٹھی ہوئی تھیں، آپ نے یہ دونوں رکعتیں پڑھنا شروع کیں تو میں نے ایک لڑکی کو آپ کے پاس بھیجا اور اس سے کہا کہ تو جا کر آپ کے بغل میں کھڑی ہوجا اور آپ سے کہہ : اللہ کے رسول ! ام سلمہ کہہ رہی ہیں : میں نے تو آپ کو ان دونوں رکعتوں کو پڑھنے سے منع کرتے ہوئے سنا ہے اور اب آپ ہی انہیں پڑھ رہے ہیں، اگر آپ ہاتھ سے اشارہ کریں تو پیچھے ہٹ جانا، اس لڑکی نے ایسا ہی کیا، آپ نے ہاتھ سے اشارہ کیا، تو وہ پیچھے ہٹ گئی، جب آپ نماز سے فارغ ہوگئے تو فرمایا : اے ابوامیہ کی بیٹی ! تم نے مجھ سے عصر کے بعد دو رکعتیں پڑھنے کے بارے میں پوچھا ہے، دراصل میرے پاس عبدالقیس کے چند لوگ اپنی قوم کے اسلام کی خبر لے کر آئے تو ان لوگوں نے مجھے باتوں میں مشغول کرلیا اور میں ظہر کے بعد یہ دونوں رکعتیں نہیں پڑھ سکا، یہ وہی دونوں رکعتیں ہیں ۔ تخریج دارالدعوہ : صحیح البخاری/السھو ٨ (١٢٣٣) ، المغازي ٦٩ (٤٣٧٠) ، صحیح مسلم/المسافرین ٥٤ (٨٣٤) ، (تحفة الأشراف : ١٧٥٧١، ١٨٢٠٧) ، وقد أخرجہ : سنن النسائی/المواقیت ٣٥ (٥٨٠) ، مسند احمد (٦/٣٠٩) ، سنن الدارمی/الصلاة ١٤٣ (١٤٧٦) (صحیح )