کریب کہتے ہیں کہ ام الفضل بنت حارث نے انہیں معاویہ (رض) کے پاس شام بھیجا، میں نے (وہاں پہنچ کر) ان کی ضرورت پوری کی، میں ابھی شام ہی میں تھا کہ رمضان کا چاند نکل آیا، ہم نے جمعہ کی رات میں چاند دیکھا، پھر مہینے کے آخر میں مدینہ آگیا تو ابن عباس (رض) نے مجھ سے چاند کے متعلق پوچھا کہ تم نے چاند کب دیکھا ؟ میں نے جواب دیا کہ جمعہ کی رات میں، فرمایا : تم نے خود دیکھا ہے ؟ میں نے کہا : ہاں، اور لوگوں نے بھی دیکھا ہے، اور روزہ رکھا ہے، معاویہ نے بھی روزہ رکھا، ابن عباس (رض) نے کہا : لیکن ہم نے سنیچر کی رات میں چاند دیکھا ہے لہٰذا ہم چاند نظر آنے تک روزہ رکھتے رہیں گے، یا تیس روزے پورے کریں گے، تو میں نے کہا کہ کیا معاویہ کی رؤیت اور ان کا روزہ کافی نہیں ہے ؟ کہنے لگے : نہیں، اسی طرح رسول اللہ ﷺ نے ہمیں حکم دیا ہے۔ تخریج دارالدعوہ : صحیح مسلم/الصیام ٥ (١٠٨٧) ، سنن الترمذی/الصیام ٩ (٦٩٣) ، سنن النسائی/الصیام ٥ (٢١١٣) ، (تحفة الأشراف : ٦٣٥٧) ، وقد أخرجہ : مسند احمد (١/٣٠٦) (صحیح ) حسن بصری سے اس شخص کے بارے میں پوچھا گیا جو کسی شہر میں ہو اور اس نے دوشنبہ (پیر) کے دن کا روزہ رکھ لیا ہو اور دو آدمی اس بات کی گواہی دیں کہ انہوں نے اتوار کی رات چاند دیکھا ہے (اور اتوار کو روزہ رکھا ہے) تو انہوں نے کہا : وہ شخص اور اس شہر کے باشندے اس دن کا روزہ قضاء نہیں کریں گے، ہاں اگر معلوم ہوجائے کہ مسلم آبادی والے کسی شہر کے باشندوں نے سنیچر کا روزہ رکھا ہے تو انہیں بھی ایک روزے کی قضاء کرنی پڑے گی ١ ؎۔ تخریج دارالدعوہ : تفرد بہ أبو داود، (تحفة الأشراف : ١٨٤٩٢) (صحیح ) وضاحت : ١ ؎ : یہ فتوی اس حدیث کے خلاف ہے جس میں ہے کہ : اللہ کے رسول ﷺ نے ایک آدمی کی گواہی پر ایک روزہ رکھنے کا حکم صادر فرمایا اور دو آمیوں کی گواہی پر عید کرنے کا حکم دیا ، یعنی : بات سچی گواہی پر منحصر ہے نہ کہ جم غفیر کے عمل پر۔