عبداللہ بن عمر (رض) کہتے ہیں کہ عمر (رض) نے کہا : اگر میں کسی کو خلیفہ نامزد نہ کروں (تو کوئی حرج نہیں) کیونکہ رسول اللہ ﷺ نے کسی کو خلیفہ مقرر نہیں کیا تھا ١ ؎ اور اگر میں کسی کو خلیفہ مقرر کر دوں (تو بھی کوئی حرج نہیں) کیونکہ ابوبکر (رض) نے خلیفہ مقرر کیا تھا۔ عبداللہ بن عمر (رض) کہتے ہیں : قسم اللہ کی ! انہوں نے صرف رسول اللہ ﷺ اور ابوبکر (رض) کا ذکر کیا تو میں نے سمجھ لیا کہ وہ رسول اللہ ﷺ کے برابر کسی کو درجہ نہیں دے سکتے اور یہ کہ وہ کسی کو خلیفہ نامزد نہیں کریں گے۔ تخریج دارالدعوہ : صحیح مسلم/الإمارة ٢ (١٨٢٣) ، سنن الترمذی/الفتن ٤٨ (٢٢٢٥) ، (تحفة الأشراف : ١٠٥٢١) ، وقد أخرجہ : صحیح البخاری/الأحکام ٥١ (٧٢١٨) ، مسند احمد (١/٤٣) (صحیح ) وضاحت : ١ ؎ : عمر (رض) کے فرمان : کیوں کہ رسول اللہ ﷺ نے کسی کو خلیفہ مقرر نہیں کیا تھا کا مفہوم یہ ہے کہ رسول اللہ ﷺ نے اپنے بعد ہونے والے خلیفہ کے لئے کسی متعین شخص کا نام نہیں لیا تھا بلکہ صرف اتنا کہہ کر رہنمائی کردی تھی کہ الأئمة من قريش چناچہ عمر (رض) نے بھی اسی سنت نبوی کو اپنا کر کبار صحابہ میں سے اپنے بعد ہونے والے خلیفہ کے لئے چھ ناموں کا اعلان کیا اور کہا کہ ان میں سے صحابہ جس پر اتفاق کرلیں وہی میرے بعد ان کا خلیفہ ہے چناچہ سبھوں نے عثمان (رض) پر اتفاق کیا۔