ابو سمح (رض) کہتے ہیں کہ میں نبی اکرم ﷺ کی خدمت کرتا تھا، جب آپ غسل کرنا چاہتے تو مجھ سے فرماتے : تم اپنی پیٹھ میری جانب کرلو ، چناچہ میں چہرہ پھیر کر اپنی پیٹھ آپ ﷺ کی جانب کر کے آپ پر آڑ کئے رہتا، (ایک مرتبہ) حسن یا حسین (رض) کو آپ کی خدمت میں لایا گیا تو انہوں نے آپ ﷺ کے سینے پر پیشاب کردیا، میں اسے دھونے کے لیے بڑھا تو آپ ﷺ نے فرمایا : لڑکی کا پیشاب دھویا جاتا ہے اور لڑکے کے پیشاب پر پانی چھڑکا جاتا ہے ۔ حسن بصری کہتے ہیں : (بچوں اور بچیوں کے) پیشاب سب برابر ہیں ١ ؎۔ تخریج دارالدعوہ : سنن النسائی/الطھارة ١٩٠ (٣٠٥) ، سنن ابن ماجہ/الطھارة ٧٧ (٥٢٦) ، ١١٣(٦١٣) (تحفة الأشراف : ١٢٠٥١) (صحیح ) وضاحت : ١ ؎ : ہوسکتا ہے کہ حسن بصری کو اس بارے میں مرفوع حدیث نہ پہنچی ہو۔