عبداللہ بن عباس رضی الله عنہما کہتے ہیں کہ رسول اللہ ﷺ کی ایک چھوٹی بچی کے مرنے کا وقت آیا تو آپ ﷺ نے اسے (اپنی گود میں) لے کر اپنے سینے سے چمٹا لیا، پھر اس پر اپنا ہاتھ رکھا، تو وہ آپ ﷺ کے سامنے ہی مرگئی، ام ایمن رضی اللہ عنہا رونے لگیں، تو رسول اللہ ﷺ نے ان سے فرمایا : ام ایمن ! تم رو رہی ہو جبکہ اللہ کے رسول ﷺ تمہارے پاس موجود ہیں ؟ تو انہوں نے کہا : میں کیوں نہ روؤں جبکہ اللہ کے رسول ﷺ (خود) رو رہے ہیں، تو آپ ﷺ نے فرمایا : میں رو نہیں رہا ہوں، البتہ یہ اللہ کی رحمت ہے ، پھر رسول اللہ ﷺ نے فرمایا : مومن ہر حال میں اچھا ہے، اس کی دونوں پسلیوں کے بیچ سے اس کی جان نکالی جاتی ہے، اور وہ اللہ تعالیٰ کی حمد و ثنا کرتا رہتا ہے ۔ تخریج دارالدعوہ : سنن الترمذی/الشمائل ٤٤ (٣٠٨) ، (تحفة الأشراف : ٦١٥٦) ، مسند احمد ١/٢٦٨، ٢٧٣، ٢٩٧ (صحیح ) قال الشيخ الألباني : صحيح صحيح وضعيف سنن النسائي الألباني : حديث نمبر 1843