سہل بن ابی حثمہ (رض) کہتے ہیں کہ عبداللہ بن سہل اور محیصہ بن مسعود بن زید (رض) خیبر کی طرف چلے، اس وقت صلح چل رہی تھی، محیصہ اپنے کام کے لیے جدا ہوگئے، پھر وہ عبداللہ بن سہل (رض) کے پاس آئے تو دیکھا کہ ان کا قتل ہوگیا ہے اور وہ مقتول ہو کر اپنے خون میں لوٹ پوٹ رہے تھے، انہیں دفن کیا اور مدینے آئے، عبدالرحمٰن بن سہل اور مسعود کے بیٹے حویصہ اور محیصہ (رضی اللہ عنہم) رسول اللہ ﷺ کے پاس گئے، عبدالرحمٰن بن سہل (رض) بات کرنے لگے تو رسول اللہ ﷺ نے ان سے فرمایا : بڑوں کا لحاظ کرو ، وہ لوگوں میں سب سے چھوٹے تھے، تو وہ چپ ہوگئے، پھر انہوں (حویصہ اور محیصہ) نے بات کی، تو رسول اللہ ﷺ نے فرمایا : کیا تم اپنے پچاس آدمیوں کو قسم کھلاؤ گے تاکہ تم اپنے قاتل (کے خون) ، یا اپنے آدمی کے خون (بہا) کے حقدار بنو ، ان لوگوں نے کہا : اللہ کے رسول ! ہم قسم کیوں کر کھائیں گے، نہ تو ہم وہاں موجود تھے اور نہ ہم نے انہیں دیکھا، آپ نے فرمایا : تو کیا پچاس یہودیوں کی قسموں سے تمہارا شک دور ہوجائے گا ؟ وہ بولے : اللہ کے رسول ! ہم کافروں کی قسم کا اعتبار کیوں کر کریں، تو رسول اللہ ﷺ نے اپنے پاس سے ان کی دیت ادا کی۔ تخریج دارالدعوہ : انظر حدیث رقم : ٤٧١٤ (صحیح ) قال الشيخ الألباني : صحيح صحيح وضعيف سنن النسائي الألباني : حديث نمبر 4715