محمد بن عبید بن ابوصالح (جو ایلیاء میں رہتے تھے) کہتے ہیں کہ میں عدی بن عدی کندی کے ساتھ نکلا یہاں تک کہ میں مکہ آیا تو انہوں نے مجھے صفیہ بنت شیبہ کے پاس بھیجا، اور انہوں نے ام المؤمنین عائشہ (رض) سے حدیثیں یاد کر رکھی تھیں، وہ کہتی ہیں : میں نے عائشہ (رض) کو کہتے سنا کہ میں نے رسول اللہ ﷺ کو فرماتے سنا : زبردستی کی صورت میں طلاق دینے اور آزاد کرنے کا اعتبار نہیں ہوگا ۔ ابوداؤد کہتے ہیں : میرا خیال ہے کہ غلاق کا مطلب غصہ ہے ١ ؎۔ تخریج دارالدعوہ : تفرد بہ أبو داود، (تحفة الأشراف : ١٧٨٥٥) ، وقد أخرجہ : سنن ابن ماجہ/الطلاق ١٦ (٢٠٤٦) ، مسند احمد (٦/٢٧٦) (حسن) (اس کے راوی محمد بن عبید ضعیف ہیں، لیکن دوسرے رواة کی متابعت و تقویت سے یہ حدیث حسن ہے ، ملاحظہ ہو : ا رواء الغلیل : ٢٠٤٧ ، و صحیح ابی داود : ٦ ؍ ٣٩٦ ) وضاحت : ١ ؎ : اس باب کے الفاظ کی روایت تین طرح ہے : على غيظ ، على غضب ، على غلطٍ اور حدیث میں غلاق ،إغلاق جس کے معنی مؤلف نے غضب کے لئے ہیں ، حالانکہ کوئی بھی آدمی بغیر غیظ و غضب کے طلاق نہیں دیتا، اس طرح تو کوئی طلاق واقع ہی نہیں ہوگی ، اس لئے إغلاق کا معنی ” زبردستی “ لینا بہتر ہے ، اور تحقیقی بات یہی ہے کہ زبردستی لی گئی طلاق واقع نہیں ہوتی۔