ابو سعید خدری رضی الله عنہ کہتے ہیں کہ علی (رض) نے یمن سے رسول اللہ ﷺ کے پاس مٹی ملا ہوا غیر صاف شدہ سونے کا ایک ڈلا بھیجا تو آپ ﷺ نے اسے چار افراد : اقرع بن حابس حنظلی، عیینہ بن بدر فرازی، اور علقمہ بن علاثہ جو عامری تھے پھر وہ بنی کلاب کے ایک فرد بن گئے، اور زید جو طائی تھے پھر بنی نبہان میں سے ہوگئے، کے درمیان تقسیم کردیا۔ (یہ دیکھ کر) قریش کے لوگ غصہ ہوگئے۔ راوی نے دوسری بار کہا : قریش کے سرکردہ لوگ غصہ ہوگئے، اور کہنے لگے کہ آپ نجد کے سرداروں کو دیتے ہیں اور ہم کو چھوڑ دیتے ہیں ؟ آپ نے فرمایا : میں نے ایسا اس لیے کیا ہے تاکہ ان کی تالیف قلب کروں (یعنی انہیں رجھا سکوں) ، اتنے میں گھنی داڑھی والا، ابھرے گالوں والا دھنسی آنکھوں والا، ابھری پیشانی والا، منڈے سر والا ایک شخص آیا اور کہنے لگا : محمد اللہ سے ڈرو، آپ نے فرمایا : اگر میں ہی اللہ تعالیٰ کی نافرمانی کرنے لگوں گا تو پھر اللہ عزوجل کی تابعداری کون کرے گا ؟ وہ مجھے سارے زمین والوں میں اپنا امین (معتمد) سمجھتا ہے، اور تم مجھے امین نہیں سمجھتے ، پھر وہ شخص پیٹھ پھیر کر چلا تو حاضرین میں سے ایک شخص نے اس کے قتل کی اجازت طلب کی (لوگوں کا خیال ہے کہ وہ خالد بن ولید (رض) تھے) تو رسول اللہ ﷺ نے فرمایا : اس کی نسل سے ایسے لوگ پیدا ہوں گے جو قرآن پڑھیں گے لیکن وہ ان کے حلق سے نیچے نہیں اترے گا ١ ؎، اہل اسلام کو قتل کریں گے، اور بت پرستوں کو چھوڑ دیں گے۔ یہ لوگ اسلام سے ایسے ہی نکل جائیں گے جیسے تیر شکار کے جسم کو چھیدتا ہوا نکل جاتا ہے۔ اگر میں نے انہیں پایا، تو میں انہیں قوم عاد کی طرح قتل کر دوں گا ۔ تخریج دارالدعوہ : صحیح البخاری/الأنبیاء ٦ (٣٣٤٤) ، والمغازی ٦١ (٤٣٥١) ، وتفسیرالتوبة ١٠ (٤٦٦٧) ، التوحید ٢٣ (٧٤٣٢) ، ٥٧ (٧٥٦٢) صحیح مسلم/الزکاة ٤٧ (١٠٦٣) ، سنن ابی داود/السنة ٣١ (٤٧٦٤) ، (تحفة الأشراف : ٤١٣٢) ، مسند احمد ٣/٦٨، ٧٢، ٧٣، ویأتی عند المؤلف فی تحریم الدم ٢٦ (برقم ٤١٠٦) (صحیح ) وضاحت : ١ ؎: یہ خارجی لوگ ہیں جن کا ظہور علی رضی الله عنہ کی خلافت میں ہوا۔ قال الشيخ الألباني : صحيح صحيح وضعيف سنن النسائي الألباني : حديث نمبر 2578