ابوسفر سعید بن احمد کہتے ہیں کہ ایک قریشی نے ایک انصاری کا دانت توڑ دیا، انصاری نے معاویہ (رض) سے فریاد کی، اور ان سے کہا : امیر المؤمنین ! اس (قریشی) نے میرا دانت توڑ دیا ہے، معاویہ (رض) نے کہا : ہم تمہیں ضرور راضی کریں گے، دوسرے (یعنی قریشی) نے معاویہ (رض) سے بڑا اصرار کیا اور (یہاں تک منت سماجت کی کہ) انہیں تنگ کردیا، معاویہ اس سے مطمئن نہ ہوئے، چناچہ معاویہ نے اس سے کہا : تمہارا معاملہ تمہارے ساتھی کے ہاتھ میں ہے، ابو الدرداء (رض) ان کے پاس بیٹھے ہوئے تھے، ابو الدرداء (رض) نے کہا : میں نے رسول اللہ ﷺ کو کہتے سنا ہے، میرے کانوں نے اسے سنا ہے اور دل نے اسے محفوظ رکھا ہے، آپ فرما رہے تھے : جس آدمی کے بھی جسم میں زخم لگے اور وہ اسے صدقہ کر دے (یعنی معاف کر دے) تو اللہ تعالیٰ اسے ایک درجہ بلندی عطا کرتا ہے اور اس کا ایک گناہ معاف فرما دیتا ہے، انصاری نے کہا : رسول اللہ ﷺ سے آپ نے سنا ہے ؟ ابو الدرداء نے کہا : میرے دونوں کانوں نے سنا ہے اور میرے دل نے اسے محفوظ رکھا ہے، اس نے کہا : تو میں اس کی دیت معاف کردیتا ہوں، معاویہ (رض) نے کہا : لیکن میں تمہیں محروم نہیں کروں گا، چناچہ انہوں نے اسے کچھ مال دینے کا حکم دیا۔ امام ترمذی کہتے ہیں : ١ - یہ حدیث غریب ہے، ہمیں یہ صرف اسی سند سے معلوم ہے، مجھے نہیں معلوم کہ ابوسفر نے ابو الدرداء سے سنا ہے، ٢ - ابوسفر کا نام سعید بن احمد ہے، انہیں ابن یحمد ثوری بھی کہا جاتا ہے۔ تخریج دارالدعوہ : سنن ابن ماجہ/الدیات ٣٥ (٢٦٩٣) ، (تحفة الأشراف : ١٠٩٧١) ، و مسند احمد (٦/٤٤٨) (ضعیف) (ابوالسفر کا سماع ابو الدرداء (رض) سے نہیں ہے، اس لیے سند میں انقطاع ہے ) قال الشيخ الألباني : ضعيف، ابن ماجة (2693) // ضعيف سنن ابن ماجة برقم (586) ، ضعيف الجامع الصغير (5175) // صحيح وضعيف سنن الترمذي الألباني : حديث نمبر 1393