عبداللہ بن عمر (رض) کہتے ہیں کہ رسول اللہ ﷺ نے فرمایا : جس نے ایسا کتا پالا یا رکھا جو سدھایا ہوا شکاری اور جانوروں کی نگرانی کرنے والا نہ ہو تو اس کے ثواب میں سے ہر دن دو قیراط کے برابر کم ہوگا ١ ؎۔ امام ترمذی کہتے ہیں : ١ - ابن عمر (رض) کی حدیث حسن صحیح ہے، ٢ - نبی اکرم ﷺ سے مروی ہے کہ آپ نے یہ بھی فرمایا : «أو كلب زرع» یا وہ کتا کھیتی کی نگرانی کرنے والا نہ ہو ، ٣ - اس باب میں عبداللہ بن مغفل، ابوہریرہ، اور سفیان بن أبی زہیر (رض) سے بھی احادیث آئی ہیں۔ تخریج دارالدعوہ : صحیح البخاری/الصید والذبائح ٦ (٥٤٨٢) ، صحیح مسلم/المساقاة ١٠ (البیوع ٣١) ، (١٥٧٤) ، سنن النسائی/الصید ١٢ (٤٢٨٩) و ١٣ (٤٢٩١-٤٢٩٢) (تحفة الأشراف : ٧٥٤٩) ، وط/الاستئذان ٥ (١٣) ، و مسند احمد (٢/٤، ٨، ٣٧، ٤٧، ٦٠) ، وسنن الدارمی/الصید ٢ (٢٠٤٧) (صحیح ) وضاحت : ١ ؎ : قیراط ایک وزن ہے جو اختلاف زمانہ کے ساتھ بدلتا رہا ہے ، یہ کسی چیز کا چوبیسواں حصہ ہوتا ہے ، کتا پالنے سے ثواب میں کمی کے کئی اسباب ہوسکتے ہیں : ایسے گھروں میں فرشتوں کا داخل نہ ہونا ، گھر والے کی غفلت کی صورت میں برتن میں کتے کا منہ ڈالنا ، پھر پانی اور مٹی سے دھوئے بغیر اس کا استعمال کرنا ، ممانعت کے باوجود کتے کا پالنا ، گھر میں آنے والے دوسرے لوگوں کو اس سے تکلیف پہنچنا وغیرہ وغیرہ۔ قال الشيخ الألباني : صحيح، صحيح أبي داود (2534) صحيح وضعيف سنن الترمذي الألباني : حديث نمبر 1487