ابوعبیدہ بن عبداللہ بن مسعود سے روایت ہے کہ عبداللہ بن مسعود (رض) نے کہا : مشرکین نے رسول اللہ ﷺ کو خندق کے دن چار نمازوں سے روک دیا۔ یہاں تک کہ رات جتنی اللہ نے چاہی گزر گئی، پھر آپ نے بلال کو حکم دیا تو انہوں نے اذان کہی، پھر اقامت کہی تو آپ ﷺ نے ظہر پڑھی، پھر بلال (رض) نے اقامت کہی تو آپ نے عصر پڑھی، پھر بلال (رض) نے اقامت کہی تو آپ نے مغرب پڑھی، پھر انہوں نے اقامت کہی تو آپ ﷺ نے عشاء پڑھی۔ امام ترمذی کہتے ہیں : ١- اس باب میں ابوسعید اور جابر (رض) سے بھی احادیث آئی ہیں، ٢- عبداللہ بن مسعود (رض) کی حدیث کی سند میں کوئی برائی نہیں ہے سوائے اس کے کہ ابوعبیدہ نے اپنے باپ عبداللہ بن مسعود (رض) سے نہیں سنا ہے، ٣- اور چھوٹی ہوئی نمازوں کے سلسلے میں بعض اہل علم نے اسی کو پسند کیا ہے کہ آدمی جب ان کی قضاء کرے تو ہر نماز کے لیے الگ الگ اقامت کہے ١ ؎ اور اگر وہ الگ الگ اقامت نہ کہے تو بھی وہ اسے کافی ہوگا، اور یہی شافعی کا قول ہے۔ تخریج دارالدعوہ : سنن النسائی/المواقیت ٥٥ (٦٢٣) ، والأذان ٢٢ (٦٦٣) ، و ٢٣ (٦٦٤) ، ( تحفة الأشراف : ٩٦٣٣) (حسن) (سند میں ابو عبیدہ اور ان کے باپ ابن مسعود کے درمیان انقطاع ہے، نیز ابو الزبیر مدلس ہیں اور ” عنعنہ “ سے روایت کیے ہوئے ہیں، مگر شواہد سے تقویت پا کر یہ حدیث حسن صحیح ہے/دیکھئے نسائی حدیث رقم ٤٨٣، ٥٣٦ اور ٦٢٢) وضاحت : ١ ؎ : ہر نماز کے لیے الگ الگ اقامت ہی راجح ہے کیونکہ ابن مسعود اور ابو سعید خدری (رض) کی حدیثوں سے اس کی تائید ہوتی ہے ، سب کے لیے ایک ہی اقامت محض قیاس ہے۔ قال الشيخ الألباني : ضعيف، الإرواء (239) صحيح وضعيف سنن الترمذي الألباني : حديث نمبر 179