عبدالحمید بن محمود کہتے ہیں کہ ہم نے امراء میں سے ایک امیر کے پیچھے نماز پڑھی، لوگوں نے ہمیں دو ستونوں کے درمیان نماز پڑھنے پر مجبور کردیا ١ ؎ جب ہم نماز پڑھ چکے تو انس بن مالک (رض) نے کہا : ہم لوگ رسول اللہ ﷺ کے زمانے میں اس سے بچتے تھے۔ امام ترمذی کہتے ہیں : ١- انس (رض) کی حدیث حسن صحیح ہے، ٢- اس باب میں قرۃ بن ایاس مزنی (رض) سے بھی روایت ہے، ٣- علماء میں سے کچھ لوگوں نے ستونوں کے درمیان صف لگانے کو مکروہ جانا ہے۔ احمد اور اسحاق بن راہویہ بھی یہی کہتے ہیں، اور علماء کچھ نے اس کی اجازت دی ہے ٢ ؎۔ تخریج دارالدعوہ : سنن ابی داود/ الصلاة ٩٥ (٦٧٣) ، سنن النسائی/الإمامة ٣٣ (٨٢٢) ، ( تحفة الأشراف : ٩٨٠) ، مسند احمد (٣/١٣١) (صحیح) وضاحت : ١ ؎ : یعنی اتنی بھیڑ ہوگئی کہ مسجد میں جگہ نہیں رہ گئی مجبوراً ہمیں دونوں ستونوں کے درمیان کھڑا ہونا پڑا۔ ٢ ؎ : اگر مجبوری ہو تب ستونوں کے درمیان صف لگائی جائے ، ورنہ عام حالات میں اس سے پرہیز کیا جائے۔ قال الشيخ الألباني : صحيح، ابن ماجة (1002) صحيح وضعيف سنن الترمذي الألباني : حديث نمبر 229