اسامہ بن زید (رض) کا بیان ہے کہ میں نبی اکرم ﷺ کے پاس بیٹھا ہوا تھا، اتنے میں علی اور عباس (رض) دونوں اندر آنے کی اجازت مانگنے لگے، انہوں نے کہا : اسامہ ! ہمارے لیے رسول اللہ ﷺ سے اجازت مانگو، تو میں نے عرض کیا : اللہ کے رسول ! علی اور عباس دونوں اندر آنے کی اجازت مانگ رہے ہیں، آپ نے فرمایا : کیا تمہیں معلوم ہے کہ وہ کیوں آئے ہیں ؟ میں نے عرض کیا : میں نہیں جانتا، اس پر نبی اکرم ﷺ نے فرمایا : مجھے تو معلوم ہے ، پھر آپ نے انہیں اجازت دے دی وہ اندر آئے اور عرض کیا کہ ہم آپ کے پاس اس لیے آئے ہیں تاکہ ہم آپ سے پوچھیں کہ آپ کے اہل میں آپ کو سب سے زیادہ محبوب کون ہے ؟ آپ نے فرمایا : فاطمہ بنت محمد ، تو وہ دونوں بولے : ہم آپ کی اولاد کے متعلق نہیں پوچھتے ہیں، آپ نے فرمایا : میرے گھر والوں میں مجھے سب سے زیادہ محبوب وہ ہے جس پر اللہ نے انعام کیا اور میں نے انعام کیا ہے، اور وہ اسامہ بن زید ہیں ، وہ دونوں بولے : پھر کون ؟ آپ نے فرمایا : پھر علی بن ابی طالب ہیں ، عباس بولے : اللہ کے رسول ! آپ نے اپنے چچا کو پیچھے کردیا، آپ نے فرمایا : علی نے تم سے پہلے ہجرت کی ہے ۔ امام ترمذی کہتے ہیں : ١- یہ حدیث حسن صحیح ہے، ٢- شعبہ : عمر بن ابی سلمہ کو ضعیف قرار دیتے تھے۔ تخریج دارالدعوہ : تفرد بہ المؤلف ( تحفة الأشراف : ١٢٣) (ضعیف) (سند میں عمر بن ابی سلمہ روایت حدیث میں غلطیاں کر جاتے تھے) قال الشيخ الألباني : ضعيف، المشکاة (6168) // ضعيف الجامع الصغير (168) باختصار // صحيح وضعيف سنن الترمذي الألباني : حديث نمبر 3819