ام المؤمنین ام سلمہ (رض) بیان کرتی ہیں کہ رسول اللہ ﷺ نے فتح مکہ کے دن فاطمہ کو بلایا، اور ان سے سرگوشی کی تو وہ رو پڑیں، پھر دوبارہ آپ نے ان سے بات کی تو وہ ہنسنے لگیں، انہوں نے بتایا کہ رسول اللہ ﷺ نے مجھے یہ بتایا کہ آپ عنقریب وفات پاجائیں گے، تو میں رو پڑی، پھر آپ نے مجھے بتایا کہ میں مریم بنت عمران کو چھوڑ کر اہل جنت کی تمام عورتوں کی سردار ہوں گی تو میں ہنسنے لگی ١ ؎۔ امام ترمذی کہتے ہیں : یہ حدیث اس سند سے حسن غریب ہے۔ تخریج دارالدعوہ : تفرد بہ المؤلف (وھو عند الجماعة من حدیث فاطمة نفسھا) ( تحفة الأشراف : ١٨١٨٧) (صحیح) وضاحت : ١ ؎ : پچھلی حدیث اور اس حدیث میں کوئی تضاد نہیں ہے ، وہ دوسرا واقعہ اور یہ دوسرا واقعہ ہے ، نیز فاطمہ (رض) ہنسنے کے دونوں اسباب میں بھی تضاد نہ سمجھا جائے ، دونوں باتیں خوش ہونے کی ہیں۔ صحيح وضعيف سنن الترمذي الألباني : حديث نمبر 3873