علی بن حجر سعدی، علی بن مسہر، اعمش، حضرت ابراہیم بن یزید تیمی سے روایت ہے کہ میں اپنے والد کو مسجد سے باہر سائبان میں قرآن سنایا کرتا تھا۔ جب میں سجدہ کی آیت پڑھتا تھا تو وہ سجدہ کرلیتے میں نے اپنے والد سے کہا اے ابا جان کیا آپ راستہ ہی میں سجدہ کرلیتے ہیں انہوں نے کہا کہ میں نے حضرت ابوذر (رض) سے سنا ہے وہ فرماتے تھے کہ میں نے رسول اللہ ﷺ سے پوچھا زمین میں سب سے پہلی کونسی مسجد بنائی گئی ؟ آپ ﷺ نے فرمایا مسجد حرام، میں نے عرض کیا پھر کونسی ؟ آپ ﷺ نے فرمایا مسجد اقصی، میں نے عرض کیا کہ ان دونوں کے درمیان کتنا فاصلہ ہے ؟ آپ ﷺ نے فرمایا چالیس سال کا، پھر ساری زمین تیرے لئے مسجد ہے جہاں تو نماز کا وقت پائے تو نماز پڑھ لے۔