قتیبہ بن سعید، زہیر بن حرب، جریر، عبدالملک بن عمیر، موسیٰ بن طلحہ، ابوہریرہ (رض) روایت ہے کہ جب یہ آیت کریمہ (وَاَنْذِرْ عَشِيْرَتَكَ الْاَقْرَبِيْنَ ) نازل ہوئی اور اپنے قریبی رشتہ داروں کو ڈرائیے، تو رسول اللہ ﷺ نے قریش کو بلایا عام وخاص سب کو جمع فرمایا پھر آپ ﷺ نے فرمایا اے کعب بن لؤی کے قبیلہ والو ! اپنے آپ کو دوزخ سے بچاؤ اے عبدشمس کے قبیلے والو ! اپنے آپ کو دوزخ سے بچاؤ اے عبد مناف کے قبیلہ والو ! اپنے آپ کو دوزخ سے بچاؤ اے بنی عبدالمطلب والو ! اپنے آپ کو دوزخ سے بچاؤ اے فاطمہ (رض) اپنے آپ کو دوزخ سے بچا لے کیونکہ میں تمہارے لئے اللہ سے کسی چیز کا اختیار نہیں رکھتا سوائے اس کے کہ میں تمہارا رشتہ دار ہوں اور بحثیت رشتہ داری کے میں تم سے صلہ رحمی کرتا رہوں گا۔