ام حصین احمسیہ (رض) کہتی ہیں کہ میں نے رسول اللہ ﷺ کو حجۃ الوداع میں خطبہ دیتے ہوئے سنا، آپ کے جسم پر ایک چادر تھی جسے اپنی بغل کے نیچے سے لپیٹے ہوئے تھے، (گویا میں) آپ کے بازو کا پھڑکتا ہوا گوشت دیکھ رہی ہوں، میں نے آپ کو فرماتے ہوئے سنا : لوگو ! اللہ سے ڈرو، اور اگر کان کٹا ہوا حبشی غلام بھی تمہارا حاکم بنادیا جائے تو اس کی بات مانو اور اس کی اطاعت کرو، جب تک وہ تمہارے لیے کتاب اللہ کو قائم کرے (یعنی کتاب اللہ کے موافق حکم دے) ١ ؎۔ امام ترمذی کہتے ہیں : ١ - یہ حدیث حسن صحیح ہے، ٢ - (یہ حدیث) دوسری سندوں سے بھی ام حصین سے مروی ہے، ٣ - اس باب میں ابوہریرہ اور عرباض بن ساریہ (رض) سے بھی احادیث آئی ہیں۔ تخریج دارالدعوہ : صحیح مسلم/الحج ٥١ (١٢٩٨/٣١١) ، والإمارة (١٨٣٨/٣٧) ، (تحفة الأشراف : ١٨٣١٣) ، و مسند احمد (٦/٤٠٢) (صحیح ) وضاحت : ١ ؎ : اس حدیث میں امیر کی اطاعت اور اس کی ماتحتی میں رہنے کی ترغیب دی جا رہی ہے ، اور ہر ایسے عمل سے دور رہنے کا حکم دیا جا رہا ہے جس سے فتنہ کے سر اٹھانے اور مسلمانوں کی اجتماعیت میں انتشار پید ہونے کا اندیشہ ہو۔ قال الشيخ الألباني : صحيح، ابن ماجة (2861) صحيح وضعيف سنن الترمذي الألباني : حديث نمبر 1706