عبداللہ بن عمر (رض) سے روایت ہے کہ رسول اللہ ﷺ نے فرمایا : جب تک معصیت کا حکم نہ دیا جائے مسلمان پر سمع و طاعت لازم ہے خواہ وہ پسند کرے یا ناپسند کرے، اور اگر اسے معصیت کا حکم دیا جائے تو نہ اس کے لیے سننا ضروری ہے اور نہ اطاعت کرنا ١ ؎۔ امام ترمذی کہتے ہیں : ١ - یہ حدیث حسن صحیح ہے، ٢ - اس باب میں علی، عمران بن حصین اور حکم بن عمر و غفاری (رض) سے بھی احادیث آئی ہیں۔ تخریج دارالدعوہ : صحیح البخاری/الجہاد ١٠٨ (٢٩٥٥) ، والأحکام ٤ (٧١٤٤) ، صحیح مسلم/الإمارة ٨ (١٨٣٩) ، سنن ابی داود/ الجہاد ٩٦ (٢٦٢٦) ، سنن النسائی/البیعة ٣٤ (٤٢١١) ، سنن ابن ماجہ/الجہاد ٤٠ (٢٨٦٤) ، (تحفة الأشراف : ٨٠٨٨) ، و مسند احمد (٢/١٧، ٤٢) (صحیح ) وضاحت : ١ ؎ : یعنی امام کا حکم پسندیدہ ہو یا ناپسندیدہ اسے بجا لانا ضروری ہے ، بشرطیکہ معصیت سے اس کا تعلق نہ ہو ، اگر معصیت سے متعلق ہے تو اس سے گریز کیا جائے گا ، لیکن ایسی صورت سے بچنا ہے جس سے امام کی مخالفت سے فتنہ و فساد کے رونما ہونے کا خدشہ ہے۔ قال الشيخ الألباني : صحيح صحيح وضعيف سنن الترمذي الألباني : حديث نمبر 1707