نبی اکرم ﷺ کے «ربيب» (پروردہ) عمر بن ابی سلمہ (رض) کہتے ہیں کہ جب آیت کریمہ «إنما يريد اللہ ليذهب عنکم الرجس أهل البيت ويطهركم تطهيرا» اے اہل بیت النبوۃ ! اللہ چاہتا ہے کہ تم سے (کفر و شرک) کی گندگی دور کر دے، اور تمہاری خوب تطہیر کر دے (الاحزاب : ٣٣) ، نبی اکرم ﷺ پر ام سلمہ (رض) کے گھر میں اتریں تو آپ نے فاطمہ اور حسن و حسین (رض) کو بلایا اور آپ نے انہیں ایک چادر میں ڈھانپ لیا اور علی (رض) آپ کی پشت مبارک کے پیچھے تھے تو آپ نے انہیں بھی چادر میں چھپالیا، پھر فرمایا : «اللهم هؤلاء أهل بيتي فأذهب عنهم الرجس وطهرهم تطهيرا» اے اللہ ! یہ میرے اہل بیت ہیں تو ان کی ناپاکی کو دور فرما دے اور انہیں اچھی طرح پاک کر دے ، ام سلمہ نے عرض کیا : اللہ کے نبی ! میں بھی انہیں کے ساتھ ہوں، آپ نے فرمایا : تو اپنی جگہ پر رہ اور تو بھی نیکی پر ہے ۔ امام ترمذی کہتے ہیں : ١- یہ حدیث اس سند سے غریب ہے، ٢- اس باب میں ام سلمہ، معقل بن یسار، ابوحمراء اور انس (رض) سے احادیث آئی ہیں۔ تخریج دارالدعوہ : انظر حدیث رقم ٣٢٠٥ (صحیح) وضاحت : ٢ ؎ : اس آیت کے سیاق و سباق اور سبب نزول سے واضح طور پر ظاہر ہوتا ہے کہ اہل البیت سے نبی اکرم ﷺ کی ازواج مطہرات مراد ہیں یا اس حدیث سے ازواج مطہرات کے علاوہ علی ، فاطمہ ، حسن اور حسین (رض) کے بھی اہل بیت میں ہونے کی بات ثابت ہوتی ہے ، اور دونوں میں کوئی تعارض نہیں۔ قال الشيخ الألباني : صحيح مضی برقم (3425) صحيح وضعيف سنن الترمذي الألباني : حديث نمبر 3787